'Suliffissaaleqisut ikiliartornerat Siumumit siuttuuffigineqarpoq'

Sapaatip akunnerata siuliani Kommuneqarfik Sermersuumi qinigassanngortittut ilaasa Jens-Erik Kirkegaardip (S), Kommuneqarfik Sermersuup borgmesteria arriippallaarnerarlugu isornartorsiorpaa.

- Kommuneqarfik Sermersuup borgmesteria, Asii Chemnitz Narup (IA) Nuummi mittarfiup allilerneqarnissaanut aningaasaliisussarsiornermi sanngiippallaarsimavoq, ilaatigut taama oqarpoq.

Ataasinngormallu Asii Chemnitz Narupip parteeqataata, kommunalbestyresimi ilaasortap Malene Lynge (IA), Jens-Erik Kirkegaardi Naalakkersuisuunermi nalaani kanngunartuliornerit saniasigut, sunik angusaqarsimanersoq?

Atuaruk: Siumumi politikeri Asiimut isorinnittoq: Ilatsiinnarpallaarputit

Suliffissaaleqisut ikiliartorput

Jens-Erik Kirkegaardilu maanna akissuteqarpoq.

Nunatsinni suliffssaaleqisut ikiliartorput tamannalu Siumup siuttuuffigingaa erseqqissaatigaa.

Siumut 2013 Naalakkersuisuutitaqalermat suliffissaaleqineq ukiut 4 ingerlanerani, IA´p siuttuuffiani, 30%-imik annertusisimavoq.

- Aalisarneq ingerlanerluppoq, inuiaqatigiinnilu aningaasarsiorneq kinguariartorluni. Maanna ukiut 4 Siumut siuttuunerani, 2013-mi Siumup ajugaanerata kingorna, suliffissaaleqisut ikiliartuinnavipput, aningaasarsiorneq siuariartoqqilerpoq, aalisarneq ingerlalluarpoq, takornariaqarneq siuariartoqqilerpoq, tusagassiuutinut oqarpoq.

Atuaruk: Asii Chemnitz Narup parteeqataata illersorpaa

Inissaaleqineq ajorluinnassangaluarpoq

Naalakkersuisut Siumut siuttuliullugu Nuummi 800 milliuunit sinnerlugit ukiuni 4-ni kingullerni aningaasaliissutigisimagaat tikkuarpaa.

- Nuummi mittarfiup tallilernissaa Siumup aaliangiisoqarmat siuttuuffigaa, pilersaarusiornerlu ingerlavoq. Suloraq, Igimaq, Norsaq pilersinneri Siumup siuttuunnerani ingerlapput.

- Naalakkersuisut ukiuni kingullerni Nuummi inissialiorsimanngittuuppata, naattoorsuutigalugu IA´p Sermersuumi qineqqusaarutini 2013-meersoq, inissiat 800 sanaartorneqassasut.

- Nuummi inissaaleqineq ajoreertigisoq, ajorseriarujussuarsimassagaluarpoq. Maannamummi ataasinnguarluunniit naammassillugu sananeqanngilaq, Jens-Erik Kirkegaard oqarpoq.

Atuaruk: Mittarfinnik alliliisoqarnissaq kommuneqarfiit marluk aallartipallakkusuppaat

Isorinnissutaa paasinngilaa

Malene Lyngep, 'Naalakkersuisut, Jens-Erik Kirkegaardip ilaasortaaffigisaasa, Nuup ineriartornissaanik kissaateqanngilluinnarnerat, akerlianilli siunertaqarnerat, eqqaamaqqissaarpaa.'

Ilumuunngilaq, Jens-Erik Kirkegaard oqarpoq.

- Nuummut aningaasaliinerit aningaasamut inatsisini ukiuni kingullerni arlaqartuni 200 mill. kr. missaaniittarmata, apeqqutaanani partii sorleq siuttuunersoq, 2013-mi (IA Demokraatillu Aningaasanut inatsisiliaat) 200 mill. miss. 2014-mi (Siumut Atassullu Aningaasanut Inatsisiliaat), 200 mill. missaani, Jens-Erik Kirkegaard oqarpoq.

Atuaruk: Siorarsiorfik – qineqqussaarnermi suliassaq pitsaavallaanngitsoq

Takornarialerinermut periusissiaq iluatsissimanngilaat

Kommuneqarfik Sermersuup takornarialerinermut periusissiaq iluatsissimanngikkaat ilanngullugu oqaatigaa.

- Siunertaq ajunngilaq, Kommuuneqarfik Sermersuumi politikkikkut aqutsisut titarnernik arlaqanngitsunik allagaqarmata takornariaqarneq pillugu periusissialiortoqassasoq. Kisianni ajoraluartumik maannakkut politikkikkut aqutsisut tamanna aamma piviusunngortinngilaat. Naammaginanngilaq.

Nangipporlu:

- Taamaammat allannguerusuppunga, takornariaqarnermut periusissiaq pilersaarullu ukiut arlaqartut ingerlaneranni kommuunitsinni takornariaqarnerup siuarsarnissaanik siunertalik.