Suliniut nutaaq: Atuartut inuussutissarsiornermik ilinniarfinnut piareersarneqassapput

Kommuneqarfik Sermersooq atuarfeqarnermut tunngatillugu suliniuteqarniarpoq, atuartut amerlanerusut inuussutissarsiornermik ilinniarfinni ilinniarnissamut piareersarnissaannut taamaalillutillu ilinniagaqarnissamut suliffittaarnissamullu periarfissaqarnerulernissaannut iluaqutaasumik.

Kommuneqarfik Sermersuumi ingerlatsiviup immikkut ittumik inuussutissarsiutit tunngavigalugit atuaqatigiiliornissamut neqerooruteqartoqarsinnaanera misissorsimavaa, neqeroorfigineqarsinnaasullu tassaassapput "atuartut tunngaviusumik suliassanut tunnganerusunut piginnaasaqarnerusut inuussutissarsiutinik ilinniarfinnut naleqquttut, assersuutigaluguli fagitigut kivitsinissaminnik amigaateqartut imaluunniit ukkassinissamik ajornartorsiuteqarlutillu kajumissuseqarnissamik amigaateqartut".

Meeqqanut, Ilaqutariinnut Atuarfeqarnermullu ataatsimiititaliap sapaatip-akunnerani matumani tamanna misissorsimavaa, kommunimilu ingerlatsiviup inassutigaa Danmarkimi 10. klassimi atuartunut neqeroorut assingusoq tunngavigalugu aaqqissuussisoqassasoq:

- EUD10-mi isumaq tunngavigineqartoq tassaavoq atuartut atuartinneqarneranni fagit ataatsimoortut killilikkat ingerlanneqassasut taakkulu atuartup inuussutissarsiutinut ilinniartitaalernissamik akuerineqarnissaanut attuumassuteqassasut. Taassuma saniatigut fagit ataatsimoortut killilikkat atuartunut inuussutissarsiutinik ilinniarfinnut atassuteqalernissamut neqeroorfigineqarnissaannut suliffeqarfinnilu attuumassuteqartuni misiliisinnaanerannut periarfissaqalersitsilluni.

Misiliummik aaqqissuussamik pilersitsisoqassasoq

Suliniut aamma atuartunik inuussutissarsiutinik ilinniarnissamut periarfissaqalersitsissaaq, suliffeqarfinnilu pineqartuni suliffimmi misiliinissamut periarfissaqalissallutik.

- EUD10-p aaqqissuussaaneranut siunertaavoq, atuartut atassuteqarnikkut suliffimmilu misiliinikkut inuussutissarsiutinik ilinniarnissamik toqqaanissaminnut qulakkeerinnissammata, aallussinikkullu atuartinnerisigut atuartut inuussutissarsiutinik ilinniarfinnut akuerisaanissaannut fagini pisariaqartinneqartunik kivitsisinnaaniassammata.

Ingerlatsivik naliliivoq suliniut nutaaq atuarfeqarnermut inatsit maanna atuuttoq atorlugu piviusunngortinneqarsinnaanngitsoq, taamaattumillu kommuni inuussutissarsiutit tunngavigalugit atuaqatigiinnik misiliutitut pilersitsinissamut Naalakkersuisunut qinnuteqassaaq.