Suliniutinut aalajangersimasunut aningaasaliissutit isumaqatigiissutiginerat Siumup nuannaarutigaa
Suliniutinut aalajangersimasunut aningaaliissutit kiisami ullumi Folketingimi isumaqatigiissutiginerisigut, Siumup kissaatini piviusunngortippai
Peqatigiiffiup Foreningen Grønlandske Børn-ip kalaallit meerartaannut Danmarkimi najugalinnut suliniutaannut Aalborgimilu Kalaallit Illuutaata Aalborgip eqqaani kalaallinut suliniutaasa taperneqartuartalernissaannut, Doris Jakobsen qulakeerinneqataavoq. Ullumi tamanna isumaqatigiissutaavoq, Folketingimi Siumup sinniisuutitaa tusagassiuutitigut nalunaarummini allappoq.
Suliniutinut aalajangersimasunut aningaasaliissutit Folketingimi isumaqatigiissutigineqarnerisigut, Siumup suliniutinut aalajangersimasunut atatillugu kissaatigisaatigalugit sulissutigisimasai piviusunngorput.
- Suliniutit aalajangersimasut aningaasalersornissaannut isumaqatigiinniarnernut Siumumiit toqqaannartumik peqataanngikkaluarluta, Siumumiit Socialdemokratinik qanimut suleqateqarnitsigut qanoq agguaassisoqarnissaa sunniuteqarfigisimavarput, Doris Jakobsen tusagassiuutitigut nalunaarummini nassuiaavoq, oqaatigalugulu namminneq suliniuteqartullu kalaallit pillugit suliniutit aningaasalerneqartarnissaannik kissaatigisatik, socialdemokratit sinnerlugit isumaqatigiinninniaqataasut peqatigalugit ataqatigiissaarinermikkut piviusunngorsinnaasimasut.
Tamatuma inernera maannakut takusinnaavarput, tassami Foreningen Grønlandske Børn-ip suliniutai kiisalu Aalborgimi Kalaallit Illuutaata kalaallit innuttaaqataasut pillugit suliniutaasa ataavartumik tapiiffigineqartuartalernissaat qulakkeerneqarput. Suliniutit tamakkua siornatigut piffissami aalajangersimasumi atugassanik tapiiffigineqartarauarput.
- Kalaallinut atatillugu suliniuteqartut ataavartumik taperneqartalernerannik pilluaqqorusuppakka. Folketingimilu partiit tamangajammik tapersiinerisigut tapiissutit qanoq agguaanneqartarnissaat isumaqatigiissutigineqarmat, tamanna aningaasanut inatsimmut ilanngunneqarnertulluunniit iluarusunnartigaaq.
- Uagut kalaallit pillugit suliniuteqartut peqatigalugit Folketingimi saqqummiussivigalugit suleqatigut Socialdemokratit uteriillutik kissaatigut naapertorlugit anguniagaqarsimanerat pillugu aamma qutsavigerusuppakka. Danmarikimi naalakkersuisunngortut kalaallit maani najugallit atugarisaasa piviusorsiortumik isiginneriaaseqarnerannut tamanna aamma takussutissaavoq, Doris Jakobsen oqarpoq.