Sulisorilikkat nutaat: Aningaasat kingusinnerusukkut nassaarineqassapput

Sulisoriligassat nutaat aningaasanut inatsimmi konto, nunami corona akiorniarlugu iliuuseqarnissamut tunngassuteqartoq aqqutigalugu aningaasaliiffigineqassapput. Konto aqqutigalugu Naalakkersuisut Kalaallit Nunaanni coronap akiorniarneqarnissaanut isumagineqarnissaanullu iliuusissanut aningaasartuuteqarnerunissamut tunngavissinneqarput.

Peqqissutsimut Naalakkersuisup Kirsten L. Fenckerip nassuiaatigaa, siunertamut immikkut kontomik pilersitsisoqarsimanngitsoq, immikkoortortaqarfilli konto atuutereersoq aqqutigalugu aningaasalersorneqassasoq.

Immikkoortortaqarfiup nutaap coronavirusip tuniluunnerata siammatsaaliorneqarnissaa sulissutigissavaa. Tuniluuttoqarnerata siammatsaaliorneqarnissaanut iliuusissaq pitsaanerpaaq tassaavoq sumiiffinni aqunneqarsinnaanngitsumik tuniluuffiusuni misissuisarnissamut maskiinanik misissueqqissaarnermi atorneqartussanik atuutsitsilerneq.

Peqqissutsimut Naalakkersuisup Kirsten L. Fenckerip nassuiaatigaa tamanna pisinnaanngitsoq, sumiiffinni bioanalytikerit maskiinanik isumaginnissinnaasut pisariaqartinneqarmata.

- Aaqqiissutaasinnaasut pitsaanerpaat tullerivaat tunnillatsissimasinnaasunik ujaasisut amerlanerulersinneqarnerat, inuit tunillatsissimasunik attaveqarsimasut sukkanerusumik attavigisinnaaniarlugit, naalakkersuisoq Sermitsiaq.AG-mut nassuiaavoq.

Suliassaqartuaannartoq

Peqqinnissaqarfimmi pisortat ilisimatitsissutigisimavaat, immikkoortortaqarfik tunillatsissimasinnaasunik ujaasisussanik 15-20-t missaannik sulisoqassasoq naatsorsuutigineqartoq. Peqqissutsimut Naalakkersuisoq sulisut Nuummi allaniluunniit sulissanersut pillugu ilisimatinneqarsimanani, illoqarfinnili ataasiakkaani tunillatsissimasinnaasunik ujaasillutik sulisussat amerlanerusinnaanerat ajornassangatinngilaa.

Peqatigitillugu oqaatigaa, immikkoortortaqarfimmi nutaami sulisut peqqinnissaqarfiup iluani suliassaqartuaannassasut, tassa naatsorsuutigisamit qaammatit arfinillit qaangiutinnginneranni tunillatsittartut ikiliartulissagaluarpata.

Tunillatsissimasinnaasunik ujaasisussat amigaataarnerat tatisisoq

Peqqissutsiumut Naalakkersuisup Kirsten L. Fenckerip nassuerutigaa, naalakkersuisoqarfiup, peqqinnissaqarfimmi pisortat Nunatsinnilu Nakorsaaneqarfiup Coronamik Akiuneq / Corona Bekæmpelsen pillugu atuutsitsilernannut pissutaanerpaasoq, tunillatsissimasinnaasunik maanna ujaasisartut malinnaasinnaannginnerat, tunillatsissimasorpassuit inuppassuarnik attaveqartarnerat pissutigalugu.

- Pingaartumik Upernavimmi Qasigiannguanilu tuniluuttoqarnerani misissugassatut tiguneqarsimasut akissutissaasa kinguaattoortarnerat misigisimavarput. Tunillatsissimasinnaasunilli ujaasisartut aamma annertuumik tatineqarsimapput, taamalu tunillatsissimasunut attaveqarsimasut mattusimatinneqarlutillu misissorneqartussat nassaariniarnerannut malinnaasinnaasimanatik. Sulisorisassat nutaat tullatsissimasinnaasunik ujaasinermi suleriaatsit pitsanngorsaaffigissavaat, Kirsten L. Fencker Sermitsiaq.AG-mut oqaluttuarpoq.