Sulisut nuukkusunngittut
Nuummi Savimilinilerinermik Ilinniarfimmi sulisut atorfimminnut atatillugu qularnartoqartuarnera qatsussimavaat, taakku isumaqarput atorfeqarnertik 1995-imili politikkikkut oqallisigineqalersimavoq.
Nuummi Saviminileriffimmik Ilinniarfimmi ilinniartitsisut allagaat naapertorlugu, politikkkerit ilinniarfik nunami illoqarfiit annersaata tullianut nuunneqarnissaat pimoorutissappassuk, sulisut arlaannaannilluunniit Sisimiunut nuunnissamik soqutiginnittoqanngilaq.
- Siullermik 1995-ip missaani tusagassiorfitsigut saqqummiunneqaqqaarpoq, taamanikkut Saviminilerinermik Ilinniarfik Sisimiunut nuunneqarniartoq pillugu Sermitsiakkut saqqummiussisoqarpoq. Tassa ilanngutassiap saqqummiunneqarneranit ukiut 26-t qaangiupput.
Nuummi Saviminilerinermik Ilinniarfimmi suisut 34-t allagartik taamatut aallartippaat.
Nuussinissaq tusagassiorfitsigut saqqummiunneqaraangat assigiinngitsunik nalunaaruteqartoqartarnera sulisunit toqqissisimanartinneqanngilaq.
- Ilinniarfiup nuunneqarnissaa pillugu assigiinngitsunik nalunaaruteqartoqartarnera sulisunut eqqarsalersitsisarpoq, Nuummi suliffissannik allamik nassaarniassanerpunga imaluunniit siunissarput qanoq issava?
Nuummi ajunngitsumik ingerlasut
Allakkat atuarfimmi sulisut sinniisaannit Hanseeraq Kleemannimit atsiorneqarsimasut naapertorlugit, sulisut arlaannaalluunniit Nuummiit nuukkusunnerlutik oqaatigisimanngilaat.
-Nuummi inissilluarsimavugut, inooqativut/aappavut Nuummi suliffeqarput, aamma meeqqavut ernguttavullu maani ajunngitsumik inuuneqarput.
Sulisut nalorninartoqarneranit sunnerneqarsimapput, neriuutigineqarporlu Naalakkersuisut piaartumik erseqqissumik nalunaaruteqarumaartutt.
Najukkami politikkerit naak?
Sulisunit kissaatigineqarpoq, Naalakkersuisut Nuummi nutaamik ilinniarfiliortoqarnissaanik aalajangissasut
- Ilinniarfitoqaq ukiunik 50-inik pisoqaassusilik suli ajunngitsumik ingerlavoq, nutaamilli ilinniarfittaarnissaq inissaminiissaaq, sulisunit oqaatigineqarpoq.
Taakku tupigusuutiginerarpaat, najukkami politikkerit Nuummi ilinniarfinnik akileraarutitigullu isertititanik attassiinnarniarlutik iliuuseqannginnerat.
- Najukkami politikkeritta Saviminilerinermik Ilinniarfiup Nuummiiginnartinneqarnissaanut tapersersuisuuppata inissaminiissagaluarpoq. Ilinniarfimmi piginnaasaqarfiit annaassavagut, ilinniartitsisut Sisimiunut nuukkusunnginnerat pissutigalugu.