Sullitat Nukissiorfinnit aningaasanik utertitsiffigineqassasut
Eqqartuussivitsigut suliani marluni aalajangiiffigineqarsimavoq, Nukissiorfiit innuttaasunik akileeqqusinermi inatsisit unioqqutillugit akitsuutinik akileeqqusisimanerat, innuttaasut akiligassinneqarsimasut akiliivallaarsimagamik aningaasat akiliutigisimasatik utertissavaat.
Inatsimmik kukkusumik paasinnissimaneq pissutaalluni inuppassuit akitsuutinik akileeqquneqarsimapput, Nukissiorfiit Sermitsiaq.AG-mut taamatut ilisimatitsissuteqarput.
- Ernianut inatsit paasinninnerput tunngavigalugu malissimavarput, eqqartuussivimmili tamanna kukkusuusoq aalajangiunneqarsimalluni, aningaasaqarnermi pisortaq Pierre Vassard oqarpoq.
Siullermik Kalaallit Nunaanni Eqqartuussivimmi tullianillu Nunatta Eqqartuussiviani nassuiaatigineqarsimavoq, Nuissiorfiit inatsit unioqqutillugu akiligassiinermik suliaqarsimasut.
- Inatsit malittuaannarparput sullitavullu akiligassatik sinnerlugit akiliuteqartussaanngillat, taamaammat suliaq manna uagutsinnut soorunami uggornarpoq, aningaasaqarnermi pisortaq oqarpoq.
Taassuma erseqqissaassutigaa, ajornartorsiummit sunnerneqarsimasut tassaasut sullitat akiliisitsiniartarfimmut innersuunneqarsimasut aamma sulliat ukiuunerani Nukissiorfinnit pilersorneqarnerminni pilersorneqarunnaarsimanngitsut.
Ukiut tallimat kingulliit suliaasimasut misissorneqartut
Sullitat akileeqqusissummik aallaqqaammut marloriarlutik nassinneqartarput, tamatuma kingornatigut Nukissiorfiit sulliap akiligassaminik akiliuteqarnissaata tunaanut pilersuinertik unitsikkallartarpaat, taamalu akileeqqusissummi immikkut akitsuusiisoqartarani, Nukissiorfinnit ilisimatitsissutigineqarpoq.
Nukissiorfiit siusinnerusukkut sultanut akiligassaminnik akiliisimanngitsunut akileeqqusissummik pingasoriarlutik amerlanerusoriarlutilluunniit nassiussisarsimapput, eqqartuussivimmilli aalajangiunneqarsimavoq, akiligassami ataatsimi arlalinniluunniit akiligassaqartoqaraluarpalluunniit akileeqqusissutinik pingasunik taamaallaat nassiussisoqarsinnaasoq.
Sullitallu qanoq amerlatigisut akileeqqusissutinik amerlavallaanik akiliuteqarsimanersut Nukissiorfinnit suli tamakkiisumik takuneqarsinnaanngilaq.
- Akileqqusissutinut akitsuusiisarneq eqqarsaatigalugu ukiuni tallimani kingullerni akileeqqusissutaasarsimasut Nukissiorfinnit misissorneqaleruttorput, akileeqqusissummullu atatillugu akitsuutinik akiliivallaartarsimasut akiliutigisimasaat utertinneqassallutik.