Sumiiffik oqaluttuarisaanermut pingaarutilik pillugu innuttaasunik akuutitsinermit inernerit piareerput
Suliaq sivisujaamik ingerlanneqareersullu Nuup Saavani susoqarnissaanik innuttaasut qanoq kissaateqarnerat Kommuneqarfik Sermersuup maanna isumassaqartilerpaa.
Bed&Breakfast, akunnittarfik pitsaalluinnartoq imaluunniit neriniartarfik aamma kulturikkut illorsuaq. Siunnersuutit arlalissuit ukiut ingerlaneranni tusarniaassutigineqartarsimapput, tamarluinnangajammilli sakkortuumik isornartorsiorneqartarsimallutik. Taamaattumik Nuup Saavata eqqaatalu Orsiviup nuunnguata ineriartortinneqarnissaannut siunnersuutit arlaannaalluunniit akuersissutigineqarsimanngillat.
Taamaattumik Kommuneqarfik Sermersooq aalajangersimavoq suliaq aallaqqaataaniit aallarteqqinniarlugu Nuummilu innuttaasut Nuup Saavanut Orsiviup Nuunnguanut sunik kissaateqarnerannik misissuisitsinermik ingerlataqarsimalluni.
Kommuni naapertorlugu suliaq maanna naammassineqarpoq, taannalu ilaatigut apersuinernik, meeqqanut workshoppertitsinernik, innuttaasunut workshoppertitsinernik aamma eqimattat qitiutinneqartut apersorneqarnerannik imaqarsimalluni.
Nuup Saava
Kommuneqarfik Sermersooq Nuup Saava pillugu ima allappoq:
Nuup Saava tassaavoq Nuup ilisarnaataa pingaarneq aamma najukkami innuttaasunit takornarianiillu ornigarneqarluaannarani Nuummut taamatullu Kalaallit Nunaata sinneranut oqaluttuarisaanermi annertuumik pingaaruteqartoq.
Nuup oqaluttuassartaa takisooq Nuup Saavata nalaani aallartiffeqarpoq, tamaani ipput illoqarfimmik tunngaviliisup Hans Egedep illua 1728-meersoq, Nunatta Katersugaasivia aamma Annaassisitta Oqaluffia 1849-mit oqaluffissaarsuartut atuuffeqartoq.
Taamaattumik illoqarfiup immikkoortua tamanna Kalaallit Nunaata, nunasiaataasimanermut aamma najukkami innuttaasunut pissusissamisoortumik atuuffeqarlunilu oqaluttuassartaqarpoq. Ulloq manna tikillugu illoqarfiup immikkoortua pisunut soqutigineqartunut arlalinnut qitiusumik katersuuffiusarpoq – taakkununnga ilanngullugu Inuiattut Ullorsiornermi.
Kommunip misissuinerit inernerinik ilisarititsissutaani atuarneqarsinnaavoq, immersugassat atorlugit misissuinerit aperineqartut 64 procentii isumaqartut, Orsiviup Nuunngua meeqqat ilaqutariillu pingaartillugit sukisaarsartarfiussasoq.
Kulturikkut illumik tapersersuisut ikittuinnaasut
Aperineqartunit taamaallaat 22 procentit isumaqarput, Orsiviup Nuunngua illumik ataatsimoortarfimmik imaluunniit kulturikkut illumik sanaartorfigineqartussatut periarfissiuunneqassasoq.
Kommuneqarfik Sermersooq nittartakkamini allappoq, innuttaasunik akuutitsineq isumassarsiatsialannik suliniutissatsialannillu arlalinnik kinguneqarsimasoq:
- Nuup Saavata siunissaanik ingerlatsineq uagutsinnit pingaartinneqaqaaq, pissutigalugu illoqarfiup immikkoortua tamanna Nuummi innuttaasunut amerlasuunut annertuumik isumaqarmat.
- Taamaattumik uagutsinnut pissusissamisoorpoq innuttaasunut saaffiginnilluta tassunga kissaataannik isummiussaannillu tusaaniaasimanerput. Qujanartumik siunnersuutinik pitsassuarnik pissarsiaqarpugut uagutsinnit kommunimi aamma minnerunngitsumik innuttaasunit tulluusimaarutigineqarsinnaasunik, Kommuneqarfik Sermersuumi Pilersaarusiornermut Oqartussaaffeqarfimmilu pisortaq, Runa Sværd oqarpoq.
Suliap ingerlariaqqinnissaa politikerinit isummerfigineqartussanngorpoq. Siunnersuutit kommunip nittartagaani takuneqarsinnaapput .
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...