Suut tamarmik akisuallaarnerisa, inissaaleqinerup pitsaanerusunillu periarfissaqarusunnerup inuit Kalaallit Nunaannit allamut nuutsittarpaat
Inuppassuit Kalaallit Nunaannit allamut nuuillutik nuuttartut pillugit akuttuallaanngitsumik oqallittoqartarpoq. Maannamulli tamatuma illuatungaanut qanoq saatsinneqarsinnaanera akissutissarsineqarsimanngilaq
Paarnannguaq Tobiassenip sooq Kalaallit Nunaannut uteqqikkusunnginnini pillugu oqaluttuarnera inuit arlallit qisuariarfigalugulu oqallisigilersimavaat.
Aamma inuppassuit nunamik qimatsillutik allamut nuuttarnerat akuttuallaanngitsumik oqallisaasarpoq. Soorlu titartaasartoq Robert Holmene ukiut marluk matuma siorna pineqartoq pillugu Facebookikkut saqqummiimmat, inuppassuit sooq nuussimanertik pillugu oqaluttuarrattut.
Taakkulu taamanikkut tunngavilersuutigisaat Paarnannguaq Tobiassenip oqaatigisaanut assigupput: Tassalu inissaaleqineq, inuuniarnerup akisuallaarnera, ilinniarfissatut periarfissat ajornerunerat politikkikkullu ingerlatsiniarnerup nukillalaarnarnera tunngavilersuutigineqarsimallutik.
- Akissaarulluinnarpugut. Ilinniagaqaraluarluni atofimmik pitsaasumik, inuusaatitsinnut akissaqartitsisumik pissarsisoqarsinnaanngilaq, alla assersuutigalugu taamanikkut allappoq.
- Kalaalit Nunaanni inuuniarneq akisuallaaqaaq. Inissiat akisupput, nerisassat, attaveqaqatigiittarnermu atortut angallassinerlu aamma akisullutik, alla allappoq.
- Kalaallit Nunaannut utissanguma allanngorluinnartoqartariaqarpoq. Ineqarniarnikkut pissutsit aaqqissuussaanerlu ajorluinnarput, taamaammat Kalaallit Nunaannut utilersaanngilanga, alla aamma allappoq.
- Politikkerit kammalaatersorlutik ileqqorluttut, innutaasut kaattut namminneq kaasarfimminnik immiisut , allamit aamma taamak allattoqarpoq.