Svane: Aliasunnermi sulinngiffeqarneq aningaasartuutaasinnaavoq annertooq
Isumaginninnermut Naalakkersuisoqarfiup IA-meersumut paragraf 37 naapertorlugu akissutaani naatsorsuinerit takutippaat, aliasunnermi sulinngiffeqartarneq millioninik pingasunik kisitsisitalinnik aningaasartuutaasinnaasoq.
Inatsisartunut ilaasortap Peter Olsenip Naalakkersuisunut apeqqutigaa ilaqutaq qaniginerpaasaq toquppat/toqujartulerpat ernereernermut, erninermut qitornavissiartaarnermullu tunngatillugu sulinngiffeqarneq naliginnaasumik atuuttoq assigalugu qaammatit arfinillit tikillugit sulinngiffeqarsinnaatitaagaanni, nunatta karsianut qanoq akeqassanersoq.
Naatsorsuinerit ajornakusoorlutillu nalorninartorujussuupput, naalakkersuisoq Jess Svane akissummini erseqqissaavoq, taamaattorli kikkut tamarmik aliasunnermi sulinngiffeqassappata aningaasartuutit 137 million koruunit angusinnaagaat, nalunaarusiami allassimavoq.
Pissutsit sisamat
Aningaasartuutit assigiinngitsunut sisamanut Naalakkersuisoqarfimmit immikkoortiterneqarsimapput, naatsorsuinerillu allattorneqarsimapput:
- Angajoqqaat 18-it inorlugit ukiulimmik annaasaqarsimasut: 2.634.263 koruunit
- Angajoqqaat qitornaminnik inersimasumik annaasaqarsimasut: 6.973.050 koruunit
- Angajoqqaaminnik annaasaqarsimasut: 121.994.619 koruunit
- Aappaminnik inooqatigisaminnilluunniit annaasaqarsimasut: 6.164.176 koruunit
- Ilimagisariaqarparpulli aningaasat taakkua amerlassusii ikinnerulaarumaartut, Jess Svane ilisimatitsivoq, aliasunnerup nalaani sulinngiffeqarnissaq pillugu aaqqissuussineq aamma qanoq sivisutigisumik inuit qanoq amerlatigisut atorniarneraat oqaatigiuminaammat.
Tamaat ataatsimut takujuminaappoq
- Assinganik tamakkiisumik takuneqarsinnaanngilaq, annaasaqarnermut atatillugu atorfillit qanoq amerlatigisut isumaqatigiissut imaluunniit immikkut isumaqatigiissut tunngavigalugu akissarsiaqartitaanersut. Aaqqissuussineq pisortanit ikiorsiissutinik pisinnaatitaaffilerlugu atuutsinneqalerpat, atorfillit ilaat napparsimanerup nalaani tamakkiisumik akissarsiaqarsinnaatitaasut, isertitanik annaasaqarnissaq pinngitsoorniarlugu napparsimanermik nalunaaruteqarneq atussaneraat naliliiffigisariaqarpoq, Jess Svane allappoq.
Peter Olsenimut akissummi sukumiisumi naalakkersuisoqarfiup sukumiisumik nassuiarpaa suut nalornissutigineqassanersut, kisitsisillu suut naatsorsuinermi ajornakusoortumi atorneqartassanersut.
Isumaqatigiissutinut tunngassuteqartoq
Jess Svane naggasiilluni ilisimatitsivoq, "sulisartut akissarsiatigut pisinnaatitaaffii pillugu apeqqummut naalakkersuinikkut akulerunnissamut Naalakkersuisut kissaateqanngimmata, tamanna isumaqatigiissutinut tunngassuteqarmat".
- Naalakkersuinikkut akulerunneq pingaarnermik isumaqatigiissummik aamma isumaqatiginninniartarnerup aaqqissuussaaneranik unioqqutitsinerussaaq, oqaluttuarisaanermi naalakkersuinikkut akuleruttoqarneq ajorpoq, aamma Naalakkersuisut isumaat malillugu taamaattariaqartoq, Jess Svane allappoq.