Syfilisi kalaallit inuusuttaanni atugaavoq
2018-imi aamma 2019-imi syfilisimik tunillatsittut nutaat amerlapput, Grønlandsmedicinsk Selskabip misissuinerata nutaap tamanna takutippaa.
Grønlandsmedicinsk Selskabip misissuinerata saqqummiunneqaqqammersup amiilaarnartumik ineriartortoqarneranik takutitsivoq:
Syfilisi atugaaleriartorpoq, pingaartumik inuusuttut akornanni.
Syfilisip piffissami 2015-imit 2019-imut misissuiffigineqarnerata 2015-imit atugaaleriartorneranik takutitsivoq, tassani innuttaasut 100.000-ugaangata tunillatsittut nutaat 85-it missaanniittarput.
2019-imi tunillatsittut nutaat 250-iullutik pingasoriaammik amerleriarput.
Danmarkimut 2018-imut sanilliullugu Statens Serum Institut naapertorlugu innuttaasut 100.000-nit inuit qulingiluat missaanniittut tunillatsittarput.
Amerleriarujussuartut
Piffissami ukiut ingerlanerini tamani tunillatsissimasuni arnat angutinit amerlanerusarput, tunillatsittullu amerlanerit 15-29-it akornanni ukioqarput.
Pingaartumik 2018-imi aamma 2019-imi ukioqatigiiaat taakku akornanni tunillatsittut nutaat amerleriarput, innuttaasut 100.000-nit tunillatsittut nutaat 800-t missaaniillutik (assi takuuk).
Tunillatsittut angutit anguteqatiminnik atoqateqartartut akornanniittut ikinnerupput, assersuutigalugu Danmarkimi aamma USAmi taakku tunillatsittut amerlanerusarput.
Pingaartumik suiaaqatiginngisaminnik atoqateqartartut akornanni tuniluuttoqarnerusoq inernerit takutippaat.