Taamaattumik KAIR taxanut akiliuteqartitsisinnaavoq
Immikkut aqqusinermik taxartarfimmik pilersitsisoqarsinnaaneranut imaluunniit immikkut kiffartuussinermut akiliuteqartitsisoqarsinnaaneranut inatsisini inerteqquteqanngilaq, tamanna nunaminertamik akuerisaasumik atuinermut naapertuuppat, Nunap immikkoortuani pilersaarusiornermut immikkoortortaqarfik, Aningaasaqarnermut Naalakkersuisoqarfimmut atasoq, ilisimatitsivoq
- Taxanut, taxartarfimmik kiffartuussinermik atuisunut, akiliuteqartitsineq pisussamut isernermut assersuunneqarsinnaavoq, taamaalillunilu inatsisit ilaat unioqqutinneqarnavianngillat, Jonas Clemens Sermitsiaq.AG-mut oqarpoq.
Taxartartut aqqusernganut tunngatillugu nunaminertamik atuisinnaatitaanermut pisisoqaranilu tunisisoqanngitsoq erseqqissarpaa.
Sinaakkutitut atugassarititaasut
Mittarfiit nutaat pingasut sanaartorneqarnerannut, ingerlanneqarnerannut aningaasalersorneqarnerannullu inatsisitigut sinaakkutissaqartoq Jonas Clemens oqarpoq:
“Kalaallit Airports A/S Nuummi Ilulissanilu mittarfinnik nunanit tamalaanit atorneqartartussanik sanaartortuuvoq, piginnittuuvoq ingerlatsisuuvorlu, mittarfiit taakkununnga atassuteqartut, tikittarfiit, atortulersuutit, taakkununngalu attuumassuteqartut, ingerlatsineq, sanaartornerit illullu ilanngullugit.”
- Kalaallit Airports A/S mittarfiit eqqaani nunaminertanik atuisinnaatitaassasoq Inatsisartut aalajangernikuupput. Taamaasilluni Kalaallit Airports A/S-ip nunaminertat taakkua pilersaarutinut tunngaviusut naapertorlugit aqutsisinnaanngortippai, Jonas Clemens ilisimatitsivoq, ilanngullugulu oqaatigalugu Kommuneqarfik Sermersooq nunaminertanut oqartussaasuusoq.
Oqallitsitsivoq
Kalaallit Airportsip maajip aallaqqaataaniit taxanut aqqusinermik nutaamik atuisunut tamanut 10 koruuninik akiliisitsisalernissaa oqallisaangaatsiarpoq. Ilaasunut ataasiakkaanut timmisartoqarfimmut nutaamut apuunneqartunut aaneqartunulluunniit Nuuk Taxip akiliut tamanna marloriaatinngortinniarpaa.
Siumumi politikerip Doris J. Jensenip akiliut eqqartorneqartoq inatsisinut naapertuunnersoq tupigusuutigaa, tunngavilersuutigalugu “ataatsimut orniguffigisinnaasatsinnut nunamik piginnittussaaneq atunnginnatsigu”. Paragraf 37 naapertorlugu Naalakkersuisunut apeqquteqarpoq akissutissarlu utaqqillugu.
Aamma atuaruk: Taxanut akitsuut: KAIR akuerisaagami, Doris aperivoq