Taasinerit tammaraluartut nassuiaqquaat
Qinersinermut ataatsimiititaliap nalilersussavaa taasinerit tammaraluartut kommuneni qinikkat katitigaanerannik allannguissanersoq
Allakkatigut taasinerit 41-ut Kommuneqarfik Sermersuup innuttaasunut sullissivianit ingerlateqqinneqarsimanngillat kommunalbestyrelsemut aamma ilagiit sinniisaannut apriilip aappaani qinersisoqarmat. Allakkatigut taasinerit aatsaat apriilip 25-at nassaarineqarput taamalu taasinerit kisinneqarneranni ilaatinneqarsimanatik. Suli ilisimaqqissaarneqanngilaq qinikkat katitigaanerannut aamma sinniisussat tulleriiaarnerannut tamanna sunniuteqassanersoq.
Atuaruk: Asiip qinersinermi kukkuneq tupassutigaa
Qinersinermut ataatsimiititaliaq ulluni makkunani ataatsimeeqattaarpoq maannalu piumasaraat pisimasoq pillugu sukumiisumik nassuiaasoqarnissaa.
Kommunet arlaqarput
- Tamatuma kingorna qinersinermut Ataatsimiititaliap naliliiffigissavaa allakkatigut taaasinerit qinersivinni ilaasortanngortut agguarnerannut, ilaasortanngortut katitigaanerannut imaluunniit sinniisussanngortut tulleriinnerannut allanngortitsisinnaanersut, qinersinermut ataatsimiititaliaq sinnerlugu Søren Stach Nielsen nalunaarpoq.
Allakkatigut taasinerit nassaarineqartut ima agguataarsimapput:
• Allakkatigut taasinerit 31-t Kommuneqarfik Sermersuumi kommunalbestyrelsimut qinersinermut attuumassuteqartut
• Allakkatigut taasineq ataaseq Qaasuitsup Kommuniani kommunalbestyrelsimut qinersinermut attuumassuteqartoq
• Allakkatigut taasinerit marluk Kommune Kujallermi kommunalbestyrelsimut qinersinermut attuumassuteqartut
• Allakkatigut taasinerit marluk Qeqqata Kommuniani kommunalbestyrelsimut qinersinermut attuumassuteqartut.
• Allakkatigut taasinerit tallimat Nuummi ilagiit sinniisaannut qinersinermut attuumassuteqartut