Taasinermi peqquserlunneq pillugu allakkat Ruth Heilmannip ilisimasimavai
Inatsisartut siulittaasuata Ruth Heilmannip, Siumut, Inatsisartuni taasinermi peqquserlunneq pillugu allakkat ikinnerpaamik ataatsit oktoberip 15-iannili ilisimasimavai.
Inatsisartunut ilaasortap Emilie Olsenip, Atassummeersup, nassuerneranut atatillugu KNR-p Nutaarsiassaqartitsiviata paasisimavaa, Naalakkersuisunut ilaasortaq Kim Kielsen, oktoberip 15-iannili Inatsisartut siulittaasut Ruth Heilmann paasissutississimavaa Inatsisartuni taasisarnerni peqquserluttoqartarsimasoq.
Radioavisip aamma paasisimavaa Ruth Heilmann sapaatip akunnerani kingullermi sisamanngornermi novemberip 20-ianni Emilie Olsenimut allagaqarsimasoq tamatumani pillarneqassanngitsoq, pissutigalugu Emilie Olsenip Inatsisartut siulittaasuat kukkunerminik nammineerluni paasitissimamagu.
Inatsisartut ingerlatsinermut peqqussutaanni nr. 11-mi, 20. oktober 1988-imersumi allassimavoq inatsiartut taasinermi taamaallaat peqataasinnaasut namminneq ataatsimiittarfimmi najuukkunik.