Taasinermi toortakkat suli qinngarnarput
Marlunngormat Inatsisartut qangatut taasisanertik atorpaat.
Inatsisartut taasinerminni elektroniskimik atortuat suli ajornartorsiortitsinnguatsiarpoq. Marlunngormnat inatsisarni ilaasortat nikueqattaarlutik »qanga ileqquusutut« taasisariaqartarput.
Paasineqarpoq ikkuttagaq aaseq ajoquteqartoq atorsinnaanani, taamaattumik isiginnaarussuarmi inuit 28-t najuuttut nalunaarsimallutik, naak ilaasortat 29-t inersuarmiikkaluartut.
Marlunngornermi ullaap tungaani Inatsisartut ataatsimiinnerat tassaavoq inatsisartut inissitsiterlutik ataatsimiinnerat, tassani Inatsisartut ataavartumik ataatsimiititaliaanni ilaasortat sinniisussallu toqqarneqarlutik. Taasinerit ingerlanneqarput Nordisk Rådimut ilaasortassat aammattaaq Inatsisartut ombudsmandianik toqqaanissami.
Ataatsimiititaliat allattorsimaffiat tamanut saqqummiunneqassaaq ataatsimiititaliat ataasiakkaarlutik inissititereeriarpata.
Marlunngornikkut kingusinnerusumik nalunaaqutaq 13.00 inatsisartut immikkut ittumik ataatsimiinnerat aallartissaaq, tassani ullormut oqaluuserisassat pingasuupput: Akileraarutinut 2010-mi ilanngaatissat, Great Greenlandimut immikkut ittumik aningaasaliissutissat millionit koruunit arfineq-pingasut, aammattaaq Royal Greenlandimut immikkut ittumik aningaasaliissutissat 503,75 mio. koruunik killiliussiffigineqartut. Immikkoortoq kingulleq matoqqasumik ingerlanneqassaaq.