Takornariaqarnermi aningaasat kisimik apeqqutaappat

Ullumikkut kalaallit kulturiat tassaavoq nunarsuup sinneranik attaveqarnerup inernera, tamanna niuernerusimappat, ajoqersuiartorsimaneruppat, nunasiaataanerusimappat, sakkutooqarfeqarneq imaluunniit ilisimatusarneq. Ullumikkut takornariaqarneq nunarsuup sinneranut isikkiviuvoq pingaaarutilik. Kalaallit Nunaat suli takornarianut amerlanerusunut inissaqarpoq pinngortitarsuarlu tikinneqarsinnaanngitsoq pinnersorsuulluni, tamannalu inuppassuarnit akiliilluni takorusunneqartarpoq. Takornariat qanoq amerlatiginissaat immaqa pingaarnerunngilaq – pingaarnerullunili paasissallugu takorariaqarneq suniarneripput? Takornariat kalaallinit sunik takutikkusunneqarpat? Takornariaqarneq sutigut iluaqutigissavarput takornariallu sutigut sunniuteqartissavagut?

Misigisassarsiorluni takornariaqarneq Kalaallit nunaanni pitsaasumik ineriartorpoq, umiarsuillu takornariartaatsit atorlugit takornariaqarnermi ukiualuit ingerlaneranni ukiumut umiarsuarnut 40-nut annertusisimavoq. Inuussutissarsiutillu allat assigalugit takornariaqarneq aamma ukiuni aggersuni akimmisaartinneqassaaq nunap aningaasassaaleqinera tikikkuminaassusialu peqqutigalugit. Suli takornariat nunanit allaneersut ikittuinnaat Kalaallit Nunaaniliartarput, takornariallu annertuumik amerligaluarpata amerlavallaalernissaat ilimanarani.

Takornariaqarneq aningaasaqarnikkut ineriartortitseqataasinnaavoq suliffissanillu pilersitsilluni. Aamma takornariaqarneq Kalaallit Nunaannik kalaallinillu avammut nittarsaasuuvoq. Takornariat tamarmik Kalaallit Nunaannit takussutissaminermik angerlaassisarput. Tassani pinngortitarsuarmi misigisassat inuillu kulturiat qitiusumik inissisimapput. Aammali aallaaniartitsinerit, sakkortuumik timersornerit ukiunilu kingullermi silap pissusaanik ilisimasaqarluarnerit Kalaallit Nunaanni takornariat misigisassaannut ilaapput. Takornarialli Kalaallit Nunaannit nutaaliaasumit sunik angerlaassisarpat?

Takornariat tarrarsorfissatut atorsinnaavagut, taamaalilluta kulturerisarput, kinaassuserput qanorlu paasineqarusunnerput oqallisigiuartarlugu. Sammisassat immikkut ittut toqqarnerisivut pinngortitaq kulturilu salliutillugit takornariat kalaallilu Kalaallit Nunaanni nutaaliaasumik ataatsimoorlutik pinngortitaq misigisaqarfigilluassagaluarpaat. Ullumikkut kalaallit nunarsuarmioqatanissamik soqutigisaqartuupput illoqarfimmi inuunernik piniartuunermik aalisartuunermillu soqutigisaqarnermut ilanngullugu. Namminersornerup eqqunneqarnerani kalaallit kulturiata suuneranik nukittuunik, nutaaliaasunik ataatsimoorfiusumillu isiginnittaaseqarnissamik pisariqaqartitsivugut. Takornariaqarneq aqqutigalugu periarfissaqarpoq ileqqutoqqat attatiinnarnissaannut kinaassuserlu nutaaq piorsarlugu.