Takornariartaat ikkarleqqasoq: Ulinnerit marluk qaangitereersut umiarsuaq suli ikkarleqqavoq
Umiarsuaq takornariartaat Ocean Explorer Tunup avannaarsuani Aplpefjordimi ikkarleqqasoq suli kaannganngilaq.
Umiarsuarmi takornariartaammi Ocean Explorerimi ilaasut 112-it missaannik amerlassusillit umiarsuarmilu inuttat inuit 94-it missaanniittut ikkarleqqagaluarlutik ajunngillat, sakkutuullu timmisartuanik qulaavaanerani naqissuserneqarpoq umiarsuaq ikummatissamik ernganngitsoq taamaalillunilu avatangiisinut mingutsitsinngitsoq, tamanna Issittumi Sakkutooqarfiup Sermitsiaq.AG-mut ilisimatitsissutigaa marlunngornermi nal. 16:30.
Issittumi sakkutuut nakkutilliisuisa pisortaat, Brian Jensen Sermitsiaq.AG-mut oqaluttuarpoq pisoq ilungersunartorsiorfiulissagaluarpat, umiarsuit umiarsuup ikkarleqqasup ungasinngisaaniittut ikiuunnissaminnut piareersimasut, taamatuttaaq Islandip sineriaani nakkutilliisut aamma ikiuunnissaminnut piareersimasut:
- Umiarsuaq attaveqarfigaarput. Umiarsuaq ikkarlimmalli manna tikillugu marloriarluni ulereeraluarpoq, umiarsuarli suli kaannganngilaq. Maanna neriuutigaarput pingajussaa ulippat kaanngarsinnaassasoq, tassami maanna Knud Rasmussen orniguppoq, takornariartaatilli ikkarliffia ungasissorujussuarmiippoq. Taamaattorli pilersaarutit arlallit sillimanitsinni piareersimasuutigaagut, tassa annaassiniarneq aallartinneqartariaqalissappat tamatumunnga sillimavugut, nakkutilliisuutitat pisortaat, Brian Jensen, Sermitsiaq.AG-mut oqaluttuarpoq.
