københavn
Takussutissaq: Københavnimi Politiit pasineqartoq imatut nassaaraat
Arfininngornerup ullukkuata unnuaatalu ingerlaneranni Københavnimi pingasoriarluni eqqaassisoqarpoq. Uani atuakkit
Annonse
Arfininngornerup unnuaanilu Københavnimi eqqaassinerit suli tamakkiisumik qulaajarneqanngillat, uanili pisimasut pingaarnerit atorlugit ullup unnuallu affaata ingerlanerani pisup pinartup ingerlarnga takusinnaavat:
- Arfininngormat ualikkut nalunaaqutaq 15 Københavnimi Østerbromi illumi kulturisiorfimmi Krudttønden oqallilluni ataatsimiititsinermi ´Kunst, Blasfemi og Ytringsfrihed´-imi tusarnaartorpaaloqarpoq.
- Peqataasut ilagaat svenskeq titartaasartoq oqallissaarisartorlu Lars Vilks. Svenskip Muhammed-imik titartaasartup taassuma peqataanera pissutigalugu aaqqissuussinermi annertuumik isumannaallisaasoqarsimavoq. Isumaqartoqarpoq saassussineq tassunga sammitinneqartoq.
- Oqallitsitsineq akunnerup affaata missaanik ingerlareersoq angut arabiamiorpaluttoq aallaammik amusivoq illullu kulturisiorfiup paarlersuanit 20-t 40-ullu akornanni igeriarpoq, politiillu pingasut ikilerlugit.
- Qallunaaq filmiliornermi ilitsersuisartoq 55-inik ukiulik, aaqqissuussinermi tassani peqataasoq, toqutaavoq.
- Isiginnittut arlallit oqaluttuarput saassussisoq saassussinermi nalaani oqaatsit arabiamiorpasissut atorlugit suaartarsimasoq. Kingorna VW Polo-mik taartumik qimaavoq, akunnerillu marluk qaangiuttut taanna Borgervænget eqqaani nassaarineqarpoq.
- Taxartartup pasineqartoq Østerbromi Kildevældsskolen-imut aavaa, nalunaaqutarlu 16.17 Ydre Nørrebromi Mjølnerparken-imi najugaqarfianut niullugu.
- Minutsit 20-t qaangiuttut angut tassannga aneqqippoq. Tamanna videokut immiussani, politiit pigilersimasaanni, takuneqarsinnaavoq.
- Nalunaaqutaq 19 qaangilaaraa Københavns Politi nalunaarput pisimasoq peqqarniitsuliornertut misissoritsik.
- Saassussinerup kingorna Københavnip ilarujussuani politeerpassuaqarpoq.
- Nalunaaqutaq sapaatinngorluni unnuap qeqqata missaani pisimasut suli pinarseriaqqipput, Indre By-mi Krystalgade-mi synagoge-p saavani juuteq pigaartoq 37-nik ukiulik niaquatigut aallaaneqarmat.
- Tamatuma saniatigut politiit marluk, aappa tallimigut aappaalu nissumigut, aallaaneqarput.
- Tamatuma kingorna politiit tamaaniittut amerlisinneqarput.
- Nalunaaqutaq 04.00 København Politi nalunaarput inuk, Krystalgademi niaqqumigut aallaatissimasoq toqusimasoq. Politiit suli tigusaqanngillat.
- Nalunaaqutaq 05.30 politiit Twitter-ikkut allapput Københavnimi eqqaassinerit pingajuat pisimasoq, tamatumuuna Nørrebro Station-imi. Politiit inummik aallaannittut nalunaarutigineqarpoq. Kingorna politiit nalunaarutigaat angut toqusimasoq.
- Københavns Politi isumaqarput inuk toqunneqartoq tassaasoq Østerbromi Krystalgade-milu saassussisuusoq. Tamanna video-kut nakkutilliissutit pasinarsisippaat, politiit sapaatiummat ullaakkut nalunaaqutaq arfineq-pingasunut tusagassiortunut paasissutissiigamik oqarput.
- Sapaatiummat nalunaaqutaq 13 tusagassiortunik katersortitsinermi Københavnimi politiinspektør Thorkild Fogde oqaluttuarpoq saassussisuusorineqartoq, sapaatiummat unnuakkut Københavnimi Nørrebromi politiinit aallaaneqarluni toqunneqartoq, politiit kinaassusersisimagaat.
- Tusagassiortunik paasissutissiinermi tassanissaaq PET-p pisortaa Jens Madsenip oqaatigaa, Politiets Efterretningstjeneste-p angut siumut ilisimareeraa.