Takutikkumasaq erseqqissisillugu
Ina Rosing eqqumiitsulianik saqqummersitsinermik nutaamik ammaassaaq Kuupik Kleistip ukiortaami ilassinninneranut atatillugu
Ina Rosingip Kalaallit Nunaat isumassarsiorfigalugu qalipagai aqqaneq-marluk qimerualaariartornissaannut tunngavissaqarluarpoq. Qalipakkat sisamanngornermit Københavnimi Den Nordatlantiske Bryggemi saqqummersinneqassapput. Qalipakkat ataasiakkaat imminneq takutitaqarusupput aammali tamarmik ataatsimoorussaqarlutik.
Qalipakkat isiginnaarlugit ataatsimoorussaraat killingusaap ersarinnera, qilaap immallu immikkoorutaanik ersersitsiinnaratik aamma kipisanermik neriuummillu takutitassaqarput. Isiginnaarlugit allaanngilaq umiarsuarmiilluni sumut tamaanga qinersinnaalluni. Taama suliaqarsimaneq pillugu eqqumiitsuliortoq 46-nik ukiulik saqqummersitsivissami iigai qaqortuusut malillugit iluarsaasisariaqarsimasoq oqarpoq:
- Imaannarsuarmiilluni nuna erseriartulersillugu nutaamik pitsaanermillu aallartinnissamik neriuuteqarsorinartarpoq, umiarsualivimmut ilisimalluakkamut angerlaraanni, arnaappat imaluunniit suna ilisimanngisaq neriuuteqarluni ornitaappat, Ina Rosing oqarpoq. Taanna eqqumiitsuliortutut nunatsinnit eqqumiitsuliortorsuit Aka Høegh aamma Anne-Birte Hove ilinniarfigisimaqalugit.