Tallimanngornikkut soraajaartarneq
Nunat avannarliit ilaannit allamit piffissaq suliffiusoq akunnernit 40-niit 37-nut sivikillineqarpoq. Sulisut mianeriniarlugit Kalaallit Nunaanni taamaaliortoqartariaqarpoq – taamaalillunilu aamma sulisut pingaarutillit avataaneersut oqilisaaffigalugit, ilaatigut nakorsat, politikeri isumaqarpoq.
Savalimmiuni naalakkersuisooqatigiilersut sapaatip-akunneranut akunnerit suliffiit 40-niit 37-nut ikilisinniarlugit isumaqatigiissuteqaqqammerput, taamaalillunilu Kalaallit Nunaat nunani avannarlerni kisiartaalluni akunnernik 40-nik aalajangiusimannittuulerluni. Ukiut 33-lli matuma siornatigut 1990-imi Danmarkimi akunnerit suliffiusut 37-nngortinneqarput.
Aviisi AG taama allaaserisaqarpoq.
Demokraatiniit Anna Wangenheim piffissap suliffiusup sivikillinissaanik suliniuteqartut siuttuattut inissisimalersimasoq ineriartornermut malinnaaqqissaarpoq.
- Nunatsinni killiffipput imaalersimassaaq akunnerit suliffiusut ikilinissaannik oqallisiginnissinnaalerluta. Inuit isumaqartut sulinerusinnaallutik taamaaliukutsoorsinnaapput, arlaatigullu pillarneqassanngillat soorlu akileraarnikkut imaluunniit allaffissornikkut aporfissalersorneqarlutik. Sulisulli tamarmik pinngitsaalillugit assigiissinniarneqassanngillat, ilaqutariinnik aaqqissuusseriaatsit assigiinngitsut peqqutigalugit suut ingerlalluarnissamut pisariaqarnersut assigiinngimmata, taamaalillutillu annertunerpaamik inuiaqatigiinnut iluaqutaallutik, oqarpoq.
- Piffissap suliffiusup sivikillineratigut iluaqutissaq pitsaanerpaaq tassaavoq innuttaasut timikkut tarnikkullu peqqinnerulernissaat. Ilisimatusarnerit tamarmik tikkuussipput, sivikinnerusumik sulisoqaraangat napparsimalluni sulinngittarneq annikillisartoq, tamannalu pisortanut aningaasarpassuarnik sipaarutaasarpoq, nangilluni oqarpoq.
Allaaserisaq tamaat AG-mi saqqummertumi kingullermi uani atuaruk:
