»Tarnikkut nakuuserneq inuunermut navianarsinnaavoq«
Inuit asissuisartut, uumisaarisartut, inoqatinik malersuisartut imaluunniit inooqatiminnik nakkutiginnittartut ingerlaannartumik unitsinneqartariaqarput. Tamatumunnga peqatigitillugu Nunatsinni inunnik niueruteqartoqartarnersoq misissuiffigineqassaaq.
Ilaanneeriarluni inuk alutornarnerpaaq sussaanngilluinnartumik assigerluinnagaqarsinnaasarpoq. Inummut taamaattumut asannilersooruit – arnamut angummulluunniit – sakkortuumik asaqatigiinneq ingerlaannartumik qaangiussinnaavoq annilaanganermillu aamma qanoq iliorsinnaannginnermit taarserneqarsinnaalluni.
Aviisi AG taama allappoq.
Taamaattorli kinaluunniit annilaangalluni imaluunniit ataqatigiissumik aaqqissuussamik nikanarsarneqassanngilaq nakutigeqqissaarneqarlunilu.
Tamanna Naalakkersuisut maanna qulakkeerniarsariniarpaat inatsimmik aalajangersakkamik, tarnikkut nakuusernermik pinerlunninngortitsinermik atuutilersitsinermikkut.
Anguniagaq tamanna inatsisit atuutsinneqarnerannut suliassaqarfimmut Naalakkersuisut 2022-mut anguniagassatut takorluugaanni pingaarnersiuinerannilu, Naalakkersuisoqarfimmit saqqummiunneqartumi allassimavoq.
- Inuup kiffaanngissuseqarneranut inuullu tarnikkut peqqissusaanut tarnikkut nakuuserfigineqarneq annertoorujussuarmik kinguneqarsinnaavoq. Tarnikkut nakuuserfigineqarnermit kingunerlutsitsinerit – ingammik qanigisaasut iluanni – sivisoorsuusinnaapput allaat inuuneq naallugu kingunerluutaasinnaallutik, tassami tarnikkut nakuuserfigineqarnerup eqqugaasut tarnikkut innarligassaannginnerat nungujartortittarpaa, Inatsisinik Atuutsitsinermut Naalakkersuisoqarfiup saqqummersitaani nutaami taama eqikkaasoqarpoq.
Tarnikkut nakuusertarneq Danmarkimi pinerluttulerinermut inatsimmi ukiut pingasut matuma siornagut ilanngunneqarpoq. Taamanimiilli tappavani arlalinnik eqqartuussisoqareerpoq.
Angut inooqatigisimasaminik nikassaarpasissumik aamma narrunarsaasumik nakkutiginnissimasutut qaammatini sisamani parnaarussassanngortinneqarpoq. Aviisimi Berlingskemi allaaserineqartoq naapertorlugu angut pisuunnginnerarpoq, pinerluttuliornermili eqqugaasup eqqartuussivimmi oqaluttuaraa, angutip aqussimagaani aamma ilaqutaanit ikinngutaanillu mattunniarsarisimallugu – kiisalu ajortunik nalunaarfigisarlugu uumisaarlunilu asissortarsimagaani.
Suliami allami ilungersunarnerusumi angut alla eqqartuussisuuneqarfimmit ukiup aappaata affaani parnaarussassanngorlugu eqqartuunneqarpoq. Tamatumanili eqqartuunneqarnerani pineqarlutik tarnikkut aamma timikkut nakuuserneq.
Aviisimi AG-mi atuarnerusinnaavutit. Aviisi uani pissarsiariuk: