Tarnikkut nappaatilinnut immikkoortortaqarfik amerlanerusunik siniffilerneqassaaq
Peqqissutsimut Naalakkersuisoqarfik qanittukkut tarnikkut nappaatillit immikkoortortaqarfissaannik sanaartornissamik nutaamik suliarinnittussarsiuussissaaq, Dronning Ingridip Napparsimmavissuani tarnikkut nappaatillit immikkoortortaqarfianni A1-imi pissutsit ernumanartut, qanittukkut ombudsmandimit nalunaarusiami erseqqissarneqartut, aaqqinneqarsinnaaniassammata.
A1-imi pissutsit pillugit ombudsmandi ernumassuteqartoq tusagassiuutitigut allaaserineqareersorlu, tarnikkut nappaatillit immikkoortortaqarfianni ajornartorsiutit ilisimaneqarluartut, Peqqissutsimut Naalakkersuisoqarfik ilisimatitsivoq.
Aamma atuaruk: Tarnimikkut nappaatillit immikkoortortaqarfianni pissutsit ernumanartut
"Immikkoortortaqarfimmi sulisut napparsimasunut iliuuseqangaarsimanerat erseqqissaatigissallugu naleqquttoq“ Naalakkersuisoqarfik naqissusiivoq, tamannalu aamma ombudsmandip nalunaarusiaani erserpoq, sulisut amerlassusaat napparsimasullu inissisimaffii ajornartorsiutaasut.
Siniffiit amerlanerusut
- Tarnip nappaataanut napparsimmaviliornissamik neqeroorutigineqartumut siullermut neqerooruteqarsimasoqannginnera pissutigalugu neqeroortitsineq tunuartinneqarpoq. Kingorna neqerooruteqarnissamut immersugassaq allanngortinneqarpoq, taamaalilluni siniffiit 16-iniit 20-nut amerlineqarsinnaalerput, nutaamillu neqerooruteqartitsinissaq piareerniarneqarpoq, naalakkersuisoqarfik ilisimatitsivoq, erseqqissarlugulu tamanna suliniutit arlallit ilaannarigaat.
- 2024-mut aningaasanut inatsimmi amerlanerusut tarnikkut nappaateqartut matoqqasumik katsorsarneqarsinnaanissaannut immikkut aningaasaliisoqarpoq
- Peqqinnissaqarfimmi sulisussarsiortarneq pitsanngorsarneqarniarpoq
- Nuna tamaat tarnikkut nappaatillit immikkoortortaqarfiisa ineriartortitsinissaat pilersaarusiorneqarpoq
- Aamma danskit naalakkersuisuinik suleqateqarneq neriuutissiivoq.
Tarnip pissusaanik ilisimasallit aajalangersimasut
- Tarnip pissusaanik immikkoortortaqarfiit pitsaanerulersinniarlugit suliniutit ilaatigut danskit naalakkersuisuinik suleqateqarneranik ilaqarput, taamaalilluni siunissami nunap immikkoortuini immikkut ilisimasalinnik ataatsimik amerlanerusunilluunniit piffissap ilaani ”nunatsinnut tunngasumik” suliassaqartinneqartunik atorfinittoqarsinnaalissaaq. Tamanna isumaqarpoq Dronning Ingridip Napparsimmavissuani tarnip pissusaanik immikkut ilisimasalinnik ikiortissaqassasoq, peqqissutsimut naalakkersuisoqarfik allappoq.
Peqqissutsimut Naalakkersuisoqarfik erseqqissaavoq, ajornartorsiutit “imaaliallaannaq aaqqinneqarsinnaanngitsut” aamma “piffissami sivisuumi suliarineqartussaasut, suliarli aallartittoq”.