Tarnikkut nappaatillit eqqortumik ikiorserneqarneq ajorput - tamannalu ulorianarsinnaasunik pilersitsisinnaavoq

Naalakkersuisut inunnut tarnikkut nappaatilinnut timimikkulluunniit innarluutilinnut ulloq unnuarlu paaqqinnittarfinni inissaqartitsinissaq isumagisussaavaat, kommunalbestyrelsillu najugaqaqatigiiffinni aamma najugaqarfinni illersugaasuni inissat pisariaqartinneqartut naammattut pigineqarnissaat isumagisussaallugu.

Tamanna innarluutillit pillugit inatsimmi allassimavoq.

Taamaakkaluartoq Nuummi Frelsens Hørimi korpslederip Nathanael Münchip oqaluttuaraa, innuttaasut tarnimikkut nappaatillit arlallit ikiorserneqartanngitsut angerlarsimaffeqanngitsuusullu. Puiguttornermiit skizofrenimut nappaateqarput, taanna nassuiaavoq.

Taakku ilaat unnuisarfimmi najugaqarput - ilaallu arlallit najugaqatigiiffimmi paaqqinnittarfimmiluunniit najugaqartariaqaraluarlutik. Korpslederi unnuisarfimmi pissutsinik, tarnikkut nappaatillit aaqqiagiinngissitsilertarnerannik oqaluttuunneqartarsimasoq oqarpoq.

- Ajornartorsiut annertooq unammillernartunik pilersitsisarpoq.

Ilanngullugu oqaatigaa:

- Kingullertigut arnat utoqqaat marluk unnuisarfimmiittartut toqqissisimanngitsutut misigisarlutik oqaluttuarisimavaat.

- Naakkinartoq

Arnat Sermitsiaq.AG pingasunngornermi ualikkut Frelsens Hærimut pulaarmat apersorneqarusussimanngillat. 55-inilli ukiulik Palle Sandgreen Nuummi Kongevejimiittumik unnuisarfimmiittartoq apersorneqarsinnaanerarpoq.

- Oqaloqatigiissinnaasarpugut. Tassa unnuisarfimmeeqatigiittartuusugut, Palle Sandgreen oqaluttuarpoiq.

Taassuma nassuiaatigaa, ilaannikkooriarluni oqqattoqarsinnaasartoq, toqqissisimasutulli misigisimanerarluni. Palle Sandgreenip oqaluttuaraa, angut inuusuttoq unnuisarfimmi uniffeqarani pisorusaaginnavittartoq.

- Tamanna uagutsinnut uuminarsinnaasarpoq, naakkinaqaarli. Sulisut angummik taamatut atugaqartumik isumaginninnissamut ilinniagaqanngillat. Angut pineqartoq nakorsaatitortuuvoq, aperiinnartarpaalli: Nakorsaatinnik iisivit? Angiinnartarpoq, imaassinnaavorli iisisimanngitsoq.

Palle Sandgreenip oqaatigaa, inuit pineqartumik isumaginninnissamut piginnaasallit amigaatigineqartut.

Ikiorserneqaranilu isumassorneqanngitsoq

Angut inuusuttoq taanna angummik allamik ineqateqarpoq, Palle Sandgreen malillugu, aamma tarnikkut patajaappallaanngitsumik atugaqartumik. Qanittumi angut kamalersimavoq, nipituumik oqalulluni angullu inuusuttoq uniffeqarani pisorusaaginnavissoq annersarnialerlugu.

- Unitsinneqarpoq, taamatummi iliortoqartussaanngimmat, Palle Sandreen oqarpoq, nassuiaatigalugulu angut tarnimigut patajaappallaanngitsumik atugaqartoq eqqissisarneqarsimasoq:

- Naakkinaqaat, isumagineqanngillammi. Niui napisimasuuppata Sanamut unitsinneqarsimassangaluarput, tassanilu isumagineqarlutik, maanili isumagineqartanngillat.

Palle Sandreen oqarpoq, angut inuusuttoq uniffeqarani ingerlarusaaginnavissoq isumassorneqarnissamik ikiorserneqarnissamillu amigaateqartoq.

- Isumassorneqanngilaq, tarnikkut nappaatilinnut najugaqaqatigiiffiit ulikkaaqqammata. Taamaammat angerlarsimaffeqanngitsut unnuisarfiannut inissinneqarsimavoq. Nammineq silarsuaaqqaminiippoq ikiorserneqartariaqarlunilu.

Ajornartorsiut tamanna innarluutillit illersuisuata Anja Hynne Nielsenip ilisimaarilluinnarpaa. Qanittukkummi nassuiaatigaa, inuit tarnimikkut nappaatillit peqqinnissaqarfimmi uninngasimasut uninngatinneqarunnaaraangamik angerlarsimaffeqanngitsunngorsinnaasut - naak Inatsisartut inuit innarluutillit tapersersorneqarnissaat pillugu inatsimmik atuutsitsilereeraluartut.