Tasiilami innuttaasoq: Sajuppillatsitsisarlunilu nipitoqaaq
Thomas Ørum Kristensenip Tasiilameersup unnuaq piterarmat erfalasulerfia napisimavoq biiliatalu igalaavi aserorsimallutik. Sakkortunerusumik piterartoqarnera misigisimavaa, unnuarli piterarnera aamma sakkortusimaqaaq, taanna oqarpoq.
DMI naapertorlugu Tasiilami unnuaq piteraq 53 m/s-mik sakkortussuseqarsimavoq. Tasiilami innuttaasup Thomas Ørum Kristensenip oqaluttuaraa, piteraq arfininngornermi unnukkut qulingiluap missaani aallartissimasoq:
- Sakkortuumik anoreqarluni qulingiluat missaanni aallartippoq. Unnuap-qeqqalernerani sakkortunerpaamik piteralerpoq.
- Suut tamarmik tigissinnaasut teqqarput, Thomas Ørum Kristensen oqaluttuarpoq.
Nulianilu namminerisaminnik illoqarput, illuminniillu pisut malinnaaffigisimavai.
Sarfaarussimasoq
- Unnuap-qeqqalernerani ernumanarsivoq. Sajuppillatsitsisarlunilu nipitoqaaq. Sakkortoorujummik piterarpoq, taanna oqarpoq.
Sakkoirtoorujummik piterarnerani illoqarfik sarfaaruppoq:
- Unnuakkut marlup-qeqqata missaani sarfaaruppoiq. Tassanngannaq taartuinnanngormat ernumanarsilaarpoq. Nalunaaquttalli ataatsip missaa qaangiummat sarfaqaqqilerpoq.
Politiinit ilisimatitsissutigineqarpoq, innuttaasut 47-t qimarngunneqarsimasut. Ilaatigut illut igalaavisa aserorternerisa kingunerannik. Thomas Ørum Kristensenip tassunga atatillug oqartussat nersualaarpai:
Oqartussat nersualaarneqarluartut
- Qatserisartut politiillu annertuumik nersualaarpakka. Inuit unnuaq naallugu innuttaasunik ikiuuttut aatsaavissuaq misigaara, Thomas Ørum Kristensen oqarpoq.
Sapaatip ullaavani ajoqusersimasunik misissuisimavoq, Thomas Ørum Kristensenillu erfalasulerfia napisimasoq biiliatalu igalaavi aserorsimallutik.
- Igalaavut assersorsimavagut, taamaammat tamanna iluaqutaasimavoq, taanna oqarpoq.
Thomas Ørum Kristensen illoqarfimmi angalaarsimavoq, tassanilu ajoqusersimasorpassuit assiliortorsimallugit. Assini igalaarpassuit aserorsimasut takuneqarsinnaavoq.
Igalaanut assersuutit eqqaamallugit
- Isumaqarpunga inuit igalaaminnik assersuusarnissartik eqqaamasariaqaraat. Piffissami sivisuulaartumi piterarsimanngilagut, igalaanilli assersuisarnerup ajoqusertussaagaluit killilertarpai, taanna oqarpoq.
Thomas Ørum Kristensenip piterartoqartarnera arlaleriarluni misigisimavaa, erseqqissaassutigaalu unnuaq piterarnera misigisimasaani sakkortunerpaajunngitsoq.
Unnuarli piteraq sakkortunerpaat ilagaat, taanna oqarpoq.
- 1970-imi piteraq ajornerpaavoq, arlaleriarlunilu sakkortuumik piterartarsimavoq. 2015-imi 2016-imiluunniit pinerpoq ajornerpaat ilagisimavaat, taamanikkullu piterarnera unnuaq piterarneratulli sakkortutigingajappoq, Thomas Ørum Kristensen oqarpoq.