Tasiilami inuusuttut silap pissusaata allanngoriartornera pillugu ilisimatusarnermi ilaasut
Inuusuttut ornittagaat silap pissusaata allanngoriartorneranit sunnerneqartarput. Ornigarneqartartulli allanngoriartulerneri inuusuttunit ernumagineqartaraluarlutik, qimaannarneqarneq ajortut ilisimatusarluni misissuinerit takutippaat.
Tasiilami inuusuttut kangerlummiikkusunnerupput, sumiiffimmi “eqqarsaatiminnik saliisinnaagamik”, “pinngortitarmi katsorsaataasuni pitsaanersaammat”. Kangerluk inuusuttut eqqissinarilluinnagaat, silap pissusaata allanngoriartornerani aamma sunnerneqarpoq, inuusuttunut ernumanarsinnaasarluni.
Aalborg Universitetimit ilisimatusartut marluk misissuineranni tamanna paasinarsivoq. Misissuinermi Tasiilami inuusuttut, Kommuneqarfik Sermersooq aamma NGO Sustainable Now peqataatinneqarsimasut, Kommuneqarfik Sermersooq allappoq.
- Ilisimatusarnerup illoqarfimmi sumiiffiit pingaarutillit sumiissusersivai inuusuttullu sumiiffinnut qanoq atassuteqarnersut paasillugu. Sumiiffiit inuusuttut tikkuartukkatik attuumassuteqarfigilluarlugillusooq misigipput, allassimavoq.
Ornigarneqartartut nalimmassarneqartariaqarput
Misissuinermi paasineqarpoq kangerluk, arsaattarfik katersortarfillu inuusuttunit orninneqarluartartut. Taakku saniatigut inuusuttut illuat kommunillu allaffiata silataa aamma ornigarneqartarput. Sumiiffiit illoqarfimmiittut silap pissusaata allanngoriartorneranit sunnerneqarpianngikkaluartut, kangerluk Naasuliardarpillu sunnerneqarnerupput.
- Silap pissusaata allanngoriartornerata inuusuttut sumiiffinnut atassutaannut sunniutai aalajangersimasut ajornakusooraluartut, sumiiffiit tamanit ornigarneqartartut siusissumik suliniuteqartarnikkut illersorlugillu naleqqussarnissaat pingaaruteqarpoq. Misissuinerup illoqarfimmik pilersaarusiornermi innuttaasut akuutinneqartarnissaat pisariaqartoq takutippaa, Kommuneqarfik Sermersooq allappoq.
Inuusuttunik peqataatitsineq
Kommunip illoqarfiup ineriartortinnissaanut innuttaasunik akuutitsinera aamma misissorsimavaat. Siunnersuutigineqarporlu inuusuttut peqataatinneqarnerulissasut.
- Matumani soorlu inuusuttut, akulikitsumik eqqarsaatiginngitsoorneqartartut, tusarnaarneqarsinnaapput iluaqutissartaqarsinnaasumik. Kinguaariit inuusunnerusut peqataatinneqarnerisa nukittorsarneqarneratigut, Tasiilami siunissami illoqarfimmik ineriartortitsineq, inuusuttut illoqarfimmi sumiiffinnik atassuteqarluaannarnissannik qulakkeerinniffiusinnaavoq.
- Kommunip inuusuttullu akornanni suleqatigiinnikkut kiisalu siusissumik suliniuteqarnikkut ullumikkut siunissamilu kinguaariinnik atugarissaartitsinissaq qulakkeerneqarsinnaavoq. Tamatuma Tasiilaq innuttaasut illoqarfimmik pilersaarusiornermi silallu pissusaata allanngoriartornerani peqataatinneqarnerinut assersuutitsialanngortissinnaavaa, allassimavoq.