Tasiilami niviarsiaraq 12-nik ukiulik ujaarineqartoq nassaarineqarpoq
Tasiilami Politiit niviarsiaraq aqqaneq-marlunnik ukiulik ullumi ujaaraat. Niviarsiaraq arfininngornermi 5. februar nalunaaqutaq 16.00 missaani kingullermik takuneqarsoq, ajunngitsoq nassaarineqarpoq.
OBS: Niviarsiaraq nassaarineqarsimasoq ilisimatitsissutigineqarmat, allaaserisaq nal. 16.40 ilassuserneqarpoq (aaqq.)
Niviarsiaraq aqqaneq-marlunnik ukiulik Tasiilami ullumi ujaarineqarpoq.
Niviarsiaraq ujaarineqartoq ualimut nassaarineqartoq, politiit ilisimatitsipput.
Dora Ina Sanimuinnaq, aqqaneq-marlunnik ukiulik, arfininngornermi 5. februar nal. 16.00 missaani kingullermik takuneqarpoq. Niviarsiaraq piffissami tassani adressemi Napparngummumi angerlarsimaffimminiit anivoq sunngiffimmi ornittakkamukarluni. Sunngiffimmili ornittakkamut apuussimanngilaq.
Kalaallit Nunaata Politiivi tusagassiorfinnut nalunaaruteqarlutik allapput.
Niviarsiaqqap tammaaneqarnera sapaammi 6. februar nal. 14.00 politiinut nalunaarutigineqarpoq.
- Ilaqutaasut ilaquttatik niviarsiaqqallu ikinngutai attavigereerpaat, Facebookikkullu ujartuisimagaluarlutik, Kalaallit Nunaata Politiivi allapput.
Dora Ina Sanimuinnaq 165 cm-it missaannik angissuseqarpoq, saluttuuvoq, nujai qernertut tuiinut killittuullutik. Aappaluttumik kavaajaqarpoq aappaluttunillu qilattakkanik qarleqarluni.
Kalaallit Nunaata Politiivisa kissaatigaat Tasiilami innuttaasut Dora Ina Sanimuinnarmik takunnissimasut, sumiinneranilluunniit ilisimannittut politiinut, oqarasuaat 701448-mut, attaveqassasut.