Tasiilami unnukkut erinarsorneq

Marlunngornermi unnukkut minihalimi »Prinsesse Margrethes Børnehjem«-imut atasumi qaaqqusat 75-it nalliuttorsiornermi nerersuaqatigiipput. Qaaqqusat Tasiilamiit aamma nunaqarfiinit aggersuupput, nerivaallu Bouillabaisse kalaallit nerisassaataannit igaat, pingaarnertut assigiinngitsut nerisassat umimmaap tuttullu neqaat, puisillu neqaa honningimut kinitaq, ammassaat siatat paarnalerlugit kiisalu kinguleqqiutitut »Isbombe« - siku, nammineq sikuliaq assigiinngitsullu nammineq konfektiliarpassuit.

ASSIT TAKUKKIT: Dronningip Tasiilamut tikeraarneranit assit

Unnuk taanna unamminartut annerpaartaraat aqqutissaq, tassa igaffik halimit en kilometerinik ungasitsigisumiimmat aqqutaalu sivingasorujussuulluni.

– Halip tungaanut suppap ilaa userarparput, kisianni naammattumik suppaliornikuuvugut. Ajornartorsiutaavoq aqqutaani ujaqqat, kisianni ajunngilaq, unnuk taanna igasuusoq Allan Petersen qungujulluni oqarpoq. Taanna kollegiap kantiinaani igasuuvoq, tassalu tassani unnuk taanna nerersuarnissamut igaffiuvoq. Sermitsiap aallartitaata suppap qanoq mamartigisimanera naamavaa halip ataatungaani biilit matuata tunorliup ammarnerani literit arlallit suppatsiarsuaq userarneqarsimasoq kuunnerani unnuk taanna allaaqqissoq nillikujuttorlu suppamit aalisagarsunnik, qaleruasunnik aamma safranisunnik mamarunarluinnartoq naamaleramiuk.

Kommuneqarfik Sermersuup borgmesteria Asii Chemnitz Narup, IA, unnuk taanna nalliuttorsiornermi oqalugiartuuvoq kunngikkormiunullu tunissuteqarluni. Dronningip tunissutisiaraa Aka Høeghip imilertakkanik qalipagaa.

Aliikkusersuisuupput Tasiilami erinarsoqatigiit. Taakku erinaginnertik ilisimaneqaatigaat, unnuullu ingerlanerani marloriarlutik qaaqqusanut aliikkusersuipput, kunngikkormiut nal. 22-p kinguninngua nikuinnginneranni. Halimit anillakkamik erinarsoqatigiit erinnat marluk silami atorpaat. Kunngikkormiut tikeraarneranni unnuk puigunaatsoq taamatut naggaserneqarpoq.

Pingasunngornermi ualikkut kunngikkormiut Island aqqusaarlugu utissapput.