Tasiilaq aamma Paamiut: Atuarfinni corona pissutigalugu killilersuisoqalerpoq
Paamiuni Tasiilamilu meeqqat atuarfiini atuartut angajulliit piffissani allani atuariartortalissapput, atuaqatigiiaallu allanut akulerunnaveersaartalissallutik. Illoqarfinnimi pineqartuni coronavirus tuniluunnerulersimavoq.
Paamiuni aamma Tasiilami coronamik tunillatsissimasut amerliartorput. Kommuneqarfik Sermersooq aalajangerpoq illoqarfinni pineqartuni meeqqat atuarfiini coronamut killilersuutit atuutsilerniarlugit.
Kommuni nittartakkamini ilisimatitsivoq.
Tamanna ilaatigut isumaqarpoq atuartut angajulliit piffissaq alla atuariartortinneqartalissasut.
- Tasiilami Paamiunilu meeqqat atuarfiini coronamik tuniluunnermik eqqugaapput. Taamaammat iliuuserisassatsinnik assiginngitsunik pilersitsivugut, taakkulu Tasiilami Paamiunilu meeqqat atuarfiini tuniluunneq pinaveersaartissavaat, Meeqqanut Atuarfeqarnermullu ingerlatsivimmi pisortaq Lone Nukaaraq Møller oqarpoq.
Iliuutsit pingasut ukuupput:
- Angajullerni atuartut atuariartorfissaat pisinnaatillugu nikisinneqarnerat
- Taamaallaat klassikkaartumik atuartitsinerit – aamma eqaarsaarnermi
- Atuartut silamiitillutik taamaallaat klassetrineqatitik ilagisinnaavaat, atuarfiullu iluani taamaallaat klasseqatitik ilagisinnaallugit
Nuummi tuniluunneq annikinnerulersoq
Nunatta Nakorsaaneqarfia ippassaq ilisimatitsivoq tunillatsissimasut arlallit Tasiilami paasineqarsimasut. Nuummili, Ilulissani, Aasiannilu tuniluunnerup annikilliartornera nalilerneqarpoq.
Kommuneqarfik Sermersooq aalajangerpoq corona pillugu killilersuutit Nuummi meeqqat atuarfiini atuutsinneqarunnaassasut, illoqarfimmi tuniluunneq annikilliartormat.
- Nuummilu illorraap tungaanut ineriartortoqarnera peqqutigalugu meeqqat Nuummi atuartut nalinginnaasumik atuarsinnaalernerat periarfissaalerpoq, Lone Nukaaraq Møller oqarpoq.