Tasiorta 3-nik uioqalerpoq
Kinguaassiuutikkut kannguttaatsuliorfigineqarsimasunik tapersersuiniarfiup kissaatigaa oqarasuaatikkut saaffiginnittarfik ulloq unnuarlu ammasartoq.
Tasiortap aallarnisaqqaarneraniit ukiut pingasut ingerlareersimalerput. Februaarip aallaqqaataani 2007-imi Tasiorta pilersinneqarnerminiit kinguaassiuutikkut kannguttaatsuliorfigineqarsimasunik, ilaqutaasunik sullissisunillu katsorsaasimavoq, siunnersuisimavoq, pikkorissaallunilu. Tasiortami siulittaasoq Arnaq Grønvold isumaqarpoq inuit katsorsarneqarnissaminnik siunnersorneqarnissaminnik, pikkorissarneqarnissaminnullu pisariaqartitsinerat millisimanngitsoq.
- Kinguaassiuutikkut atornerlunneqarsimasut ikiorneqarnissaminnut pisariaqartitsinerat malunnartumik alliartorpoq, kinguaassiuutitigut atornerluisarnerup eqqartorneqarnerulernera ilutigalugu. Tasiortamut saaffiginnissimasut, katsorsarneqartut pikkorissakkallu arlalissuit tamanna takutippaat. Tasiortami suliassatsinnut ilaavoq kinguaassiuutitigut atornerluisoqartarneranik oqallissaarinissaq, minnerunngitsumillu atornerlunneqarsimasunik katsorsaanissaq, siunnersuinissarlu.
Arnaq Grønvold isumaqarpoq suliaq sukumiisumik ingerlatinneqassappat minnerpaamik oqarasuaatikkut saaffiginnittarfimmik ulloq unnuarlu ammasartumik pilersitsisoqartariaqartoq. Taassuma saniatigut allaffittaarnissaq suliniutaavoq.
Tasiortap oqarasuaatikkut 141-kkut siunnersuisarnini, eqimattani katsorsaasarnini kiisalu sullissisunut pikkorissaasarnini ingerlassinnaasimavai, siorna ukiormannalu 935.000 koruuninik landskarsimiit aningaasaliiffigineqarnermigut.
Oqarusuaat 141 akeqanngitsumik sianerfigineqarsinnaasoq sapaatip akunneranut marloriarluni ammasarpoq: marlunngornikkut ullaakkut nal. 8-10 sisamanngornikkut nal. 15-17. Tassani kinguaassiuutitigut atornerlunneqarsimasut tunngavilersorluakkamik siunnersorneqarsinnaapput, ajornartorsiutitik pillugit.
- Suliaq iluatsittutut oqaatigisinnaavarput ataasiinnannguarluunniit oqarasuaat 141-mut sianerpat. Kinguaassiuutitigummi atornerlunneqarneq atornerlunneqartunut inuunerup sinneranut eqqarsartaatsikkut tarnikkullu ajoqusiisarmat, pisariaqarpoq ikiortariaqartut tapersersorneqarnissaat. Arnaq Grønvold naliliivoq.