Tassaarsuaqaratarsinnaanera: Inoqutigiit 22-t allamut nuukkusuttut

Uummannap kangerluani tassaarsuaqarsinnaaneranik kingullermik misissuisimanerup takutippaa, Karrat qaqqaanik sisoortoqaqqissangaluarpat, pingaartumik nunaqarfiit marluk ulorianartorsiortinneqassasut.

Nunaqarfiit pineqartut tassaapput Niaqornat 35-nik inoqartoq aamma Qaarsut 170-inik inoqartoq.

GEUS-ip ilisimatuullu Norgemeersut ulorianartoqarneranik naliliisimanerisa sasqqummiunneqarnerannut atatillugu paasissutissiissutigineqarpoq, innuttaasut ulorianartorsiorfimmi najugaqartut tassaarsuaqarsinnaanera pissutigalugu allamut nuukkusuttut inissaannik neqeroorfigineqassasut.

Inuit 38-t nuukkusuttut

Inoqutigiit katillugit 22-usut neqeroorummut akuersaarlutik nuukkusussimapput, avatangiisinut naalakkersuisup Kalistat Lundip Inatsisartuni ilaasortamut Karl Tobiassenip (S) paragraf-37 naapertorlugu apeqqutaanut akissutaani tamanna atuarneqarsinnaavoq.

- Ineqarnermut Attaveqaasersuutinullu Naalakkersuisoqarfik INI A/S-imit paasissutissanik pissarsisimavoq. IN I-mit ilisimatitsissutigineqarpoq 17. decemberi illoqatigiit 22-it tassaarsuaqarnissaanut aarlerinaatit pillugit nuunnissamik noqqaassuteqarlutik saaffiginnissuteqarsimasut allamillu inimik tunineqarsimallutik, akissuteqaammi allassimavoq.

- Inoqutigiit 10-t ininut neqeroorutigineqartunut akuersisimapput nuussimalerlutillu. INI-p nalunaaruteqarnera malillugu inersimasut 14-it kiisalu meeqqat 11-t taakkunani qulini najugaqarput. Inoqutigiit 5-it ininut kissaatigisaminnut nuunnissamut utaqqipput. Taakkunani inersimasut 10-upput meeqqallu pingasut.

Ilisimatitsissutigineqarsimanngilaq inoqutigiit pineqartut nunaqarfimmit illoqarfimmiillu suminngaanneernersut.

Illorsuit Nuugaatsiarlu attaveqaateqanngitsut

2017-imi tassaarsuaqarmalli Illorsuit Nuugaatsiarlu inoqarsimanngillat. Inatsisartuni ilaasortap Karl Tobiassenip apeqqutigisimavaam illoqarfinni pineqartuni taakkunani marlunni telefonimut internetsimullu attaveqaasiisoqaqqinnissaanik Naalakkersuisut pilersaaruteqarnersut .

Avatangiisinut naalakkersuisut tassunga atatillugu akissutigaa, Tusass sumiiffinni inoqanngitsuni telefonimut internetsimullu attaveqaasersuinissamut pisussaaffeqanngitsoq, Naalakkersuisullu tassunga tunngassuteqartumik aalajangiussaqarsimanngitsut.

- 2018-imili Tusass 'imit ilisimatitsissutigineqareersimavoq Illorsuit aamma Nuugaatsiap eqqaani tunngaviusumik sakkortusaaviit nunaqarjiit nukissiorjiinut pilersuinerup unereersimanerisa kinguneranik kiisalu nunaqarjiit Tusass Kalaallit Nunaat tamakkerlugu 4G-mik piviusunngorsaaneranut ilaasimannginnerat peqqutaalluni atuutsileqqinneqarsinnaanngitsut. Tamanna allanngortinneqarsimanngilaq, akissuteqaammi nassuiaatigineqarpoq.

Avatangiisinut naalakkersuisut Kalistat Lundip akissuteqaammini erseqqissaassutigaa, pingaartumik Illorsuit qaqqat nakkaariataaraluarpata tassaarsuaqarsinnaaneranut suli ulorianartorsiortuusut, tassa tassaarsuaqarsinnaaneranut aarlerinartorsiorneq suli allannguuteqarsimanngilaq.

2017-imi Uummannap kangerluani tassaarsuaqarmat inuit sisamat ajunaarput.