Taxa-ruit pitsaaneruvoq
Julefrokost-it tulleriiaaginnaleruttorput, tamannalumi pissutigalugu imigassartorsimallutik biilertut politiinit eqqumaffigineqarnerulerput.
– Innuttaasunut assut inassutigerusupparput julefrokost-erialernermi biili uninngatiinnarlugu taxa-mut ilaanissaq. Assersuutissammi amerlavallaarput inuit naliliinerliortarnerannik qanoq aalakoortiginerlutik taamalu biilernissamut ussernartorsiulerlutik, taama Sermitsiaq.gl-imut oqarpoq Sisimiuni politiit pisortaat Hans Falck Petersen.
– Decemberip qaammataani biilertut pisarnermit eqqumaffiginiarnerussavagut aammalu tallimanngornermi unnukkut sulisut amerlanerussapput. Tassa naliginnaagaluarpoq politi ataaseq pingaartuusarluni. Taanna allamik ilaqartissavarput aammalu politiinut ikiortaasartut reservebetjent-it marluk aamma sulissapput, taama Hans Falck Petersen oqarpoq.
Ukiormanna Sisimiuni poltiiit ulapaarsimaqaat imaasiallaanarlu Han Falck Petersenip kisitsisit qaqissinnaanngikkallarpai imigassartorsimalluni biilernermut tunngassuteqartut.
Nuummi politiit aamma decemberip qaammataani biilertunut eqqumaneruniarput.
– Siunnerfeqartumik decemberip qaammataani imigassartorsimallutik biilertut eqqumaffiginiarpagut. Kisianni oqaatiginianngilara qaqugu qanorlu iliorluta suliaq taanna ingerlanniarnerlugu. Kisianni biilertut ilisimaannassavaat decemberip qaammataani eqqumaniarfiginerussagatsigit, taama Sermitsiaq.gl-imut oqarpoq Nuup politiivini vicepolitikommisær Bent Heisselberg.
Siorna Nuummi decemberip qaammataani imigassartorsimallutik biilertut 14-it politiinit unitsinneqarput aammalu politiit ilimagaat ukioq tamaat eqqarsaatigalugu imigassartorsimallutik biilertut siornatut amerlatigipajaassasut siorna katillugit 94-it naammattoorneqarmata.
Aammalu avannarpaallakkutta Ilulissani iliuusissaq aamma taamaappoq.
– Decemberip qaammataani biilertut eqqummaariffiginiarpagut nalunngilarpummi qaammat taanna ukiup ingerlanerani imigassartornerpaaffiusartoq, taama oqarpoq Ilulissani politiit pisortaat Janus Eigaard.
Decemberi kisiat eqqarsaatigalugu Ilulissani politiit kisitsinik tigoriaannaateqanngillat, 2006-ili tamaat eqqarsaatigalugu imigassartorsimallutik biilertut arfineq pingasut naammattoorneqarput ukiormannalu amerleriaallalaarsimapput maannamut aqqanillit naammattoorneqareermata.
Qaqortumi politiit aamma imigassartorsimallutik biilertooratarsinnaasut eqqumaffiginiarpaat.
– Pingaartumik tallimanngorneq eqqarsaatigalugu biilertut eqqumaffiginiarpagut unnullu taanna aamma politeeqarfik ammasussaavoq. Arfininngorneq eqqarsaatigalugu ammasinnaanissarput periarfissaavoq, kisianni takoqqaassavarput tallimanngorneq qanoq ingerlajumaanersoq, taama Sermitsiaq.gl-imut oqarpoq Qaqortumi politiit pisortaat Jack Nathansen.