Teknikkikkut unamminartut Maniitsumi timmisartuussinermut akornutaasut
Ajornartorsiut pissutigalugu mittarfimmut mittoqarsinnaarpianngilaq.
![Teknikkikkut unamminartut Maniitsumi timmisartuussinermut akornutaasut](https://image.sermitsiaq.ag/139218.webp?imageId=139218&width=960&height=542&format=jpg)
Distance Measuring Equipment-imik (DME) taaneqartartut Maniitsumi piffissami kingullermi ajoquteqarlutik atorsinnaasimanntillat. Atortorissaarutip timmisartortartoq mikkiartornermi mittarfik timmisartumut qanoq ungasitsiginersoq oqaluttuuttarpaa
Mittarfeqarfiit nittartakkamikkut taamatut ilisimatitsissuteqarput.
Atortorissaarummik ajornartorsiuteqarnermi timmisartortartut taamaallaat isikkivigitsillugu missinnaapput.
- Paasilertoruminaatsoq
Mittarfeqarfiit naapertorlugit, ajornartorsiut timmisartuussinermi isumannaallisaanermut sunniuteqarani taamaallaat mittarfiup miffigineqarsinnaaneranut sunniuteqarpoq.
Mittarfeqarfiit teknikkikkut immikkoortortaqarfiata piffissami kingullermi DME-it ajoqutaasa aaqqiissuteqarfiginiarnerat annertuumik ulapputigaa, suliassarli pisariusuusoq, Mittarfeqarfiit teknikkeqarnermut pisortaata oqaatigaa:
- Matumani pineqarput atortorissaarutit immikkorluinnaq ittut, pissarsiariniartarneri, ikkussuuttarneri atornissaalu pisariusut. Allatut oqaatigalugu paasilertoruminaatsuuvoq ullumikkulli aaqqiissuteqarnissaq qanillineruvoq, teknikkeqarnermut pisortaq Mike Sanimuinaq Kristiansen nassuiaavoq imalu nangilluni
Pisortanit misilerarneqarlunilu akuerineqassasoq
-Maniitsumi mittarfimmut pilertornerpaamik pitsaanerpaamillu, isumannaatsumik pisortallu piumasaqaataannut naapertuuttumik aaqqiissuteqarnissaq, sapinngisarput tamaat suliniutigaarput.
Atortorissaarutit iluarsineqareerpata misilerarneqassapput, Mittarfeqarfinnillu aamma mittarfeqarfinni pisortanit akuerineqassallutik.
- Pisortat marsip aallartisimalernerani atortorissaarutinik misileraasinnaanissaat naatsorsuutigineqarpoq. Atortorissaarutit akuerineqarpata tamatuma kingunitsianngua atorneqarsinnaalissapput, Mittarfeqarfiit allapput.