Teknologiinik saqqummersitsinermi Attavik soqutigineqarluartoq
Aappariit aallarnisaasut Poul Jørgen Holm aamma Jeanne Holm, nunarsuarmi teknologiinik saqqummersitsinerit annersaannut World Mobile Congressimut peqataaqqinnerat annertuumik misigisaqarfiuvoq
- World Mobile Congressimi Attavik aamma misiliutitut sulianut soqutiginninneq annertoorujussuuvoq.
Poul Jørgen Holm aamma Jeanne Holm Nuummeersut taama oqarput, taakku Attavik suliarisimavaat, saqqummersitsinermilu uani sapaatip-akunnerani Barcelonami peqataapput.
Tassani nittarsaassinissartik aamma aningaasaliisartunik naapitaqarnissartik naatsorsutigisimavaat.
Nunatsinni aningaasaliisartunik nassaaruminaatsoq
- Nunatsinni soqutiginnittunik aamma aningaasaliisartunik nassaarniarneq ajornakusoortorujussuusimavoq, Kalaallit Nunaata avataani soqutiginninneq annertullunilu saaffiginnittoqarluartarpoq. Nunatsinni elektronikkinik pilersitsisarneq ileqquunngilaq, aappariit oqarput.
Taakkulu oqarnerat naapertorlugu, Attavik World Mobile Congressimi soqutigineqarluarsimavoq.
- Telecomimi suliaqartut annertuut aamma aningaasaliisinnaasut arlallit pulaartoralugillu oqaloqatigaagut. Nunat assigiinngitsut naalakkersuisoqarfiinit, Attavimmik attaveqaatiminnut internetiminnullu pitsaanngitsunut aaqqiissutissatut soqutiginnittunik saaffigineqarpugut, taakku oqarput.
Attaveqaatinut internetimilu ajornartorsiutit aaqqittarai
Mobilteknologii pilersitaa ilisimatuunik tupaallatsitsisimavoq.
- Telecomimik ilisimasallit amerlasuut aqqusaarpaatigut, taakkulu Attaviup attaveqatigiinnikkut internetimilu aaqqiissutigisinnaasaat pitsaasumik tupaallaatigaat, Poul Jørgen Holm aamma Jeanne Holm oqarput.
Attavik Mobile World Congessimut peqataanissamut aappassaa qaaqquneqarput. Siullermik 2015-imi peqataapput.