mobil
Telep kisermaassinera inatsisitigut atuutsinneqalissaaq
Telep namminersortunngorsarneqarniarnera ukioq kingulleq Inatsisartut kinguartippaat. Massakkulli Naalakkersuisut inatsisitigut atuutsilersikkusuppaat
Tele-Post mobilikkut oqarasuaatikkulli kisermaassiinnarallassaaq. Naalakkersuisut taama isumaqarput, taakku atassuteqarneq nalunaarasuartaatitigullu kiffartuussinerit inatsisitigut atuutsinneqarlernissaat angorusuppaat.
2006-imi Naalakkersuisut periarfissinneqarput telep namminersortunngorsarneqarnissaanut. 2009-imi kabelitaqanngitsumik internetsi namminersortunngorsarneqarpoq 2015-imilu internet imaatigut kabelikkoortoq namminersortunngorsarneqarluni.
' Kisermaassineq pissusissamisoortoq'
Alloriarnerup annertuup tullerisussanngoraluarpaa oqarasuaatinut tunngatillugu namminersortunngorsaaneq, tamannalu Tele-Postimut kiffartuussisunngorusuttunullu nutaanut aningaasarpassuarnik isertitsissutaasinnaavoq.
2016-imilu Inatsisartut upernaakkut ataatsimiinneranni Siumut, IA aamma Partii Naleraq amerlanerussuteqarlutik namminersortunngorsaanerup kinguartinneqarnissaa aalajangerpaat.
- Tele-Postip atassuteqarneq nalunaarasuartaatitigullu kiffartuussinerit kisermaassiffigimmagit pissusissamisoorpoq, siunnersuutip oqaaseqaataani erserpoq.
Kisermaassineq attatiinnarneqarusuttoq
Namminersortunngorsaanerulli taamaatinneqarnera inatsisitigut allaqqalissasoq, Naalakkersuisut isumaqarput.
- Naalakkersuisut oqarasuaatinut tunngasut nammisortunngorsarneqarnissaanik siunertaqanngillat, inatsissasut siunnersuummi erserpoq.
Periarfissiineq
Taamaattoq namminersortunngorsaanissamik taamaatitsineq inatsisissatut siunnersuummi aalajangiunneqarsimanngilaq. Inatsissatummi siunnersuummi inatsip aalajangersakkanik immersorneqarnerani annikitsumik periarfissiisoqarsimavoq.
- Atassuteqarnermut nalunaarasuartaatitigullu kiffartuussinermut kisermaassiffigineqaannarnissaanut akuersissutigineqartoq politikkikkut attatiinnarneqarnissaanut inatsip aalajangersakkanik allanik immersorneqarnerani periarfissiisoqarpoq.
LÆS: Rapport: Opdel Tele og giv det frihedsbrev
Pilersuisinnaanerup isumannaassusaa akinit pingaarnerusoq
Tassa, politikkerit kisermaassisoqarnera attatiinnarsinnaavaat, kisianni Inatsisartuni amerlanerussuteqartut kiffartuussinerit namminersortunngorsarneqarnissaanut suli periarfissaqarput.
- Namminersortunngorsaanermik suliniutit politikkerit kissaatigissappassuk, tamanna qanimut naliliilluarnikkut aatsaat pisassaaq. Pilersuisinnaanerulli isumannaassusaa unammilleqatigiinnermiit pingaarnerutinneqartuaannassasoq, oqaaseqaammi erserpoq.
Attaveqatigiinnermulli aaqqissuussinerit, tassa kabelit nassissutillu namminersortunngorsarneqarsinnaanngitsut aalajangiusimaneqarpoq.