Thulemi sakkutooqarfik missilinut illersuummut atassanngilaq
Nato qaartartorsuarnut atomitortunut illersuummik sanappat amerikarmiut Kalaallit Nunaanni Thulemi sakkutooqarfiat tassunga atassanngilaq.
Nunanit soorlu Nordkoreamit Iranimilluunniit qaartartorsuarnik igeriunneqartunik illersuummik Nato sanassaaq. Nunattali avannaani amerikarmiut sakkutooqarfiat Thulemiittoq tassunga atassanngilaq.
Taamatut paasissutissiivoq nunanut allanut ministeri Lene Espersen (K), folketingimut ilaasortamut nunatsinneersumut Lars-Emil Johansenimut, Siumut, akissummini.
- Thulemi sakkutooqarfik amerikap nammineq Amerikamik Avannarlermik qaartartorsuarnut illersuutissaani ilaassaaq. Taamaasilluni Thulemi sakkutooqarfik Natomi qaartartorsuarnut illersuummik sananissamik aalajangernermi eqqorneqanngilaq, Lene Espersen akissummini allappoq.
Pilersaarutit malillugit Natop qaartartunut Europamik illersuutissaa 2020-mi naammassineqarsimassaaq. Sananeqarnissaa aalajangiunneqarpoq novembarimi Natop Lissabonimi ataatsimiinnerani.
Taamatut allappoq Ritzau.