TIG aalisarsinnaanermut akuersissutinut tunngatillugu Naalakkersuisut akuliuttarnerannut isornartorsiuisoq
Transparency International Greenland aalisarsinnaanermut akuersissutinik pisassiissutissanillu tunniussisoqartarneranut Naalakkersuisut akuliuttassanersut pillugu oqallinnermut ilannguppoq. Akuliuttussaanngivissut, oqaatigineqarpoq.
Aalisartut aalisarsinnaanermut akuersissutinik pisassiissutissaminnilluunniit pissarsiniarlutik Naalakkersuisumut toqqaannartumik attaveqarsinnaasarsimanerat piffissami kingullermi oqallisigineqarsimaqaaq.
Aqqaluaq B. Egedep aalisarneq pillugu isumasioqatigiittoqarnerni ajornartorsiut tamanna oqaatigisimavaa, politikkerillu aamma atorfillit arlallit uppernarsarsimavaat, aalisartut naalakkersuisumut toqqannartumik sianerlutik qinnuteqaamminnik piffissami sivisuumi utaqqisimasaminnik atorfilittanut piaartumik suliaritinneqarnissaat isumagitittarsimagaat. Tamannalu ajornartorsiutaasoq Transparency International Greenlandimit (TIG) oqaatigineqarpoq.
- Naalakkersuisup akisussaaffigaa, arlaannaataluunniit allanit salliutinneqannginnissaa, tamatumalu saniatigut kikkut tamarmik assigiimmik sullinneqarnissaat. Tassa suliakkiussamut atatillugu Naalakkersuisumik ilisarisimasaqarneq Naalakkersuisumulluunniit attaveqartarneq inunnut aalajangersimasunut iluaqutaasussaanngilaq. Qinnuteqaammik suliaqarneq tamanut assigiimmik ingerlanneqartussaavoq, inuillu ilaasa Naalakkersuisumut attaveqarluni suliap sukkanerusumik ingerlanneqarnissaanik piumasaqartassappata tamanna malinneqarsinnaanngilaq.
Malittarisassat malillugit ingerlatsisoqartartoq
Erik Jensenip aalisarnermut piniarnermullu naalakkersuisuusimasup oqaatigisimavaa, allagartannguamik sungaartumik atorfilittanut tunniussinermi qinnuteqaatip sukkanerusumik suliarineqarsinnaanera ajornartorsiutaanngitsoq.
- Inuit aqqi CPR-normuilu allaffissannguamut sungaartumut allariarlugit atorfilittanut tunniuttarpakka piumaffigalugillu piaarnerpaamik suliarissagaat. Tamatumalu kingornatigut allaffimmit suliat suliarineqarluartarlutik, Erik Jensen malittarisassat malillugit suliaqartarsimanerartoq taamatut nassuiaasimavoq.
TIG-imili siulersuisut taamatut isumaqanngillat.
- Transparency International Greenlandimit isumaqarpugut, politikkerit sulianut ingerlanneqartunut imaluunniit qinnuteqaatinut akuliuttarnerat ileqqupalaajusoq - aamma qinnuteqarsimasut ataasiakkaat akissutisinissaat anguniarneqaannaraluarpalluunniit, TIG-imi siulersuisunit oqaatigineqarpoq.
Atorfilittat pisariaqanngitsumik tatineqartartut
Siulersuisut isumaqarput, taamatut periuseqarnikkut atorfilittat pisariaqanngitsumik tatineqartartut. Suliap sulianit allanit sukkanerusumik isumagineqarniarnera paasinaraluarpoq.
- Qinnuteqaammik suliaqarneq assigiimmik pinnittussaaneq pillugu piumasaqaatit malillugit ingerlanneqartariaqarpoq, kiallu kimik ilisarisimasaqarnera tunngavigineqartussaanani. Naalakkersuisup akisussaaffigaa assigiimmik pinnilluni suliaqartoqarnissaa.
Innuttaasuttaaq TIG-imit uparuarneqarput.
- Suliakkiissummik sukkanerusumik suliaqartoqarnissaa anguniarlugu Naalakkersuisumut attaveqartarneq nalinginnaasuusuuppat, amerlanerit taamaaliortassagaluarput, ileqqupalaarlu tamanna aqqutigalugu taamaaliortartut ileqqorlunnermut ingerlatseqataapput. Kialluunniit allanit kingullinngortinneqarnissani kissaatiginavianngilaa, taamaammat sakkortunerpaamik kaammattuutigineqarpoq allanit salliutinneqarnaveersaartoqassasoq.
Aalisarneq pillugu Ataatsimiititaliarsuaq naalakkersuinikkut akuliuttoqartannginnissaanik inassuteqarpoq
Aalisarsinnaanermut akuersissutit pisassiissutillu pillugit nalunaarut 2020-mi allanngortinneqarpoq, qanorli suliamik ingerlatsisoqartarnissaa imaluunniit suli pingaaruteqarnerusumik qanoq ingerlatsisoqartannginnissaa suli erseqqissumik allassimanani, TIG-imit oqaatigineqarpoq.
- Transparency International Greenlandimit kaammattuutigissavarput, pisassiissutinik akuersissutinillu tunniussisarneq erseqqinnerulersinniarlugu tamanullu assigiimmik pinnittoqartalersinniarlugu piumasaqaatit qinnuteqaatinillu suliaqarnissap erseqqinnerulersinneqarnissaa.
Aalisarneq pillugu Ataatsimiititaliarsuup isumaliutissiissummini piumasarisimavaa, pisassiissutinik aalisarsinnaanermullu akuersissutinik tunniussisarnermi politikkerit atorfilittallu akuliutsinneqartannginnissaat. Tamatuma arlaannaannulluunniit attuumassuteqanngitsunit ingerlanneqartanissaa anguniarlugu.