Tigusanik assartuisarnerit salluliuutigigaat
Qallunaat naalakkersuisui USA-mik isumaqatigiissuteqarsimapput, qullunaat nunaata taamalu aamma Kalaallit Nunaata silaannartaanik killeqanngitsumik atuisisinnaanerannik, JyllandsPosten allappoq.
Assartuinermut ministeri Carina Christenseni (K) amerikamiut kilitsisiaqarfiata CIA-p tigusanik isertortumik assartuisarsimanerat pillugu Folketingimut akissuteqarnermini piviusumut tunngatillugu killormut oqarsimavoq. Inuinnarnit ilisimaneqanngitsumik amerikamiut timmisartuutaat oktober 2001-imiilli atuutilersumik immikkut isumaqatigiissuteqarfigineqarlutik qallunaat silaannartaannik qallunaat nunaannilu mittarfinnik killeqanngitsumik atuisinnaatitaasinneqarsimapput, tamanna peqqarniisaarniartartunut sorsunnermut tunngasuuppat.
Isumaqatigiissut ukiut tamaasa nutarterneqartarpoq, assartuinermullu ministeri tamatigut ilisimatinneqartarluni.
Carina Christensenip isumaqatigiissut pineqartoq pillugu Folketingip angallannermut ataatsimiitsitaliaanut ilisimasaqannginnini oqaatigisimagaluarpaa.
Aviisip ullaakkut saqqummersartup Jyllands-Posten-ip uppernarsarsinnaavaa, akissutit piviusnut akerliummata. Statens Lufthavnsvæsen, SLV, Carina christenseip naalakkersuisoqarfiata ataaniittoq USA-mik isumaqatigiissut pillugu allakkatigut siullerpaamik oktober 2001-imi ilisimatinneqarput, kingornalu isumaqatigiissut ukiumiit ukiumut nutarterneqareeraangat allakkatigut ilisimatinneqartarsimallutik.
Jyllands-Postenip uppernarsaatissarsereernera paasereerlugu Carina Christensenip sisamanngormat kingusissukkut Angallannermut Ataatsimiitsitaliamut allakkatigut saaffiginnissuteqarpoq, spaatip akunnerata siuliani Folketingimut akissutigisimasaminut "ilassutissat"-ut akissutigalugit.Nukinginnartumik allakkani nutaani oqaluttuarpoq, amerikamiut timmisartuinut akuersissut pillugu 2001-imi telefax-iunneqarsimasoq SLV-ip toqqorsiviani qanittukkut saqqummersimasoq.
Pappiara qaammatini marlunni Assartuinermut ministerip Folketingimut akissuteqarnissaata tungaanut ingerlanerani nassaarineqarsimanngilaq, kisiannili Jyllands-Posten-ip pappiara pigigaa ministerip paasinninnerata kinguninngua tiimialunnguit qaangiutiinnartut aatsaat saqqummerluni.