Tikaagulliusaaq New Yorkimi ikkarlissimasoq
Immikkut ilisimasallit eqqoriarpaat imarmiorsuup uumaannarnissaa ilimananngitsoq. Tikaagulliusaap timersuata angisuup ilormiui sequmissinnaapput
Tikaagulliusaaq anngajaarsuaq millionerpassuarnik inullip New Yorkip kujataatungaani ikkarlissimavoq, imarmiorsuarlu uumaannarniarluni ilungersorluni.
Tunnulissuit imaani uumasut annersaannit tikaagulliusaat minnerulaarput, maannalu tikaagulliusaaq 18 meterisut takissusilik Queensimi Breezy Pointip eqqaaniippoq.
Politiit qatserisartullu uumasoq imermik kueraaffigaat uumatiinnarniarlugu tikaagulliit pillugit immikkut ilisimasallit suliamik ingerlatsilernissaat sioqqullugu. Kisianni tikaagulliusaaq uummaannarunanngilaq, naliliisoqarpoq.
- Saluttuaraavoq peqqinnanilu, Mendy Garron oqarpoq taanna National Oceanic and Atmospheric Administration (Noaa) naalagaaffiup imaanut aamma silaannarmut tunngasunik allaffeqarfianni sulisuuvoq.
- Arfeq aalaaneq ajorpoq. Mendy oqarpoq nangilluni imaanut peqqissinnaanera ilimananngitsoq.
- Arferit angisuut ikkarlikkaangata akornartorujussuusarpoq. Piffissaq taanna ikkarlittullu ulorianartorsiulersarput pissutigalugu taakkua iloqutaat timaannit oqimaaqisumit nanertorneqalersarmata, Garron New York Timesimut oqaluttuarpoq.
Annaassiniarneq tinissimaneranit aamma akornusersorneqarpoq.
- Uumasup eqqaani imaq annikitsuinnaavoq, Garron oqarpoq taassuma ulinnissaa utaqqiinnarpaa.
Garron naapertorlugu arferit angisuut ukiumut marloriarlutik New Yorkip eqqaani tipisarput. Immikkut ilisimasallit arfersuup peqqissusaa misissussavaat kingorna susoqarnissaa aalajangiutissallugu.
Arferit assigiinngitsunik pissuteqarlutik qipisarput; napparsimasinnaapput, utoqqaallutik imaluunniit arferit umiarsuarnit eqqorneqarsimatillutik, Garron oqarpoq.
Tikaagulliusaaq inersimavoq 27 meterinik takissuseqalersinnaavoq 70 tonsinik oqimaassuseqalerluni. Arferit imarpissuarni angalaartuartuupput 100-nik ukioqalersinnaallutik.