Tilioq: isumaginninnermi siunnersortit amigaataarnerat akisuvoq
ilinniarsimasunik sulisussaqanngittarnerup malitsigisaanik, innuttaasut suliakkiissutaat amerlasuutigut kukkusumik aalajangiiffigineqartarput, piffissami sivisuallaami kinguarsarneqartarput imaluunniit unitsivinneqartarlutik, Innarluutillit illersuisuat oqarpoq.
Isumaginninnermi siunnersortit peqatigiiffianit misissueqqissaarsimanerup takutippaa, isumaginninnermi siunnersortitut ilinniagallit kommunini amigaataalluinnartut. Kommunini tamarmiusuni isumaginninnermi siunnersortitut atorfiit katillugit 231-uupput, taakkunannga 77-iinnaat isumaginninnermi siunnersortitut ilinniarsimasunit atorfigineqarlutik.
Innarluutillit illersuisoqarfianit misissuisimaneq takuneqarsimavoq, innarluutillilllu illersuisuata Anja Hynne Nielsenip oqaatigaa, Kalaallit Nunaanni tamarmi kommunini isumaginninnermi siunnersortitut ilinniarsimasut tallimaannaat inalluutilinnik sullissisuusut kisitsisit takutikkaat.
Illersuisup oqaatigaa taakkua ikippallaartut, isumaginninnermilu siunnersortit amigaataanerisa kukkusumik sullissisoqarsinnaanera annertunerulersittaraat:
- Sullissinermi ajornartorsiuteqartarneq pissutaanerpaavoq, innuttaasut Tiliumut siunnersoqqullutik saaffiginnittarnerannut. Innuttaasut saaffiginnittarnerannik misissuisimanitta uppernarsarpaat, ilinniarsimasunik sulisussaaleqinerup malitsigisaanik, innuttaasut suliakkiissutaat amerlasuutigut kukkusumik aalajangiiffigineqartarput, piffissami sivisuallaami kinguarsarneqartarput imaluunniit unitsivinneqartarlutik, Anja Hynne Nielsen tusagassiorfinnut nalunaaruteqarnermi oqarpoq.
- Pitsaanerusumik inuuneqalernissamut aalajangiisuulluinnarsinnaasoq
Innarluutillit illersuisuata Sermitsiaq.AG-mut itisiliilluni oqaatigaa, isumaginninnermi siunnersortit suliaat imminnut qaleriiaassinnaasut, siunnersortit arlallit taamaalillutik suliamik ataatsimik suliaqarsinnaasarlutik.
Innarluutilinnilli sullissineq ajornaatsuinnaanngilaq, taamaammallu immikkut ilisimasallit aamma pisariaqartinneqarput, taanna oqarpoq:
- Innarluutilinnik sullissisarneq artornartuuvoq innuttaasullu inuuneranni sunut tamanut attuumassuteqarsinnaalluni. Taamaamma ilinniarsimasunik sulisoqarnissaq pingaaruteqarpoq, taakkumi inatsiserpassuarnik oqartussaaffinnillu, inuit innarluutillit malitassaannik paasinnissimasussaapput.
- Sulisut ilinniarsimasut pitsaanerusumik inuuneqalernissamut aamma timip pisinnaasaata annikillisinnaaneranik pinaveersaartitsinissamut taamalu annertunerujussuarmik suliaqartariaqarnissamik pinaveersaartitsinissamut aalajangiisuulluinnarsinnaapput, taanna oqarpoq.
Naalakkersuisoq ilinniarsimasunik amerlanerusunik piumasoq
Innarluutillit illersuisuat isumaqarpoq, suliassaqarfiup taamatut inissisimaneranut politikkikkut aningaasaqarnikkullu pingaarnersiuisoqartannginnera pissutaasoq.
Meeqqanut, Inuusuttunut Ilaqutariinnullu Naalakkersuisup siusinnerusukkut oqaatiginikuuaa, isumaginninnermi siunnersortit amerlanerusut sulilernissamut kajumissuseqalersinnissaat sulissutiginiarlugu:
- Isumaginninnermi siunnersortitut ilinniagaqarnissaq kommuninilu isumaginninnermi siunnersortitut sulisuunissaq pilerinartuussapput. Assersuutigalugu inappassuit sulinermi kiserliorneq misigisinnaasarpaat, suleqatigiilli aaqqissussaanerisigut sulinermi ajunngitsumik ingerlasoqarnissaa siuarsarneqarsinnaavoq, Meeqqanut, Inuusuttunut Ilaqutariinnullu Naalakkersuisoq Paneeraq Olsen oqarpoq.