Ussassaarut
Tillie Martinussen: Innuttaasut ikiortariallit pisinnaatitaaffitik naapertorlugit ikiorneqanngillat
Suleqatigiissitsisut siulittaasuat Tillie Martinussen nuna tamakkerlugu politikkimi nangittumik sulinissaminut piareersimavoq. Sassaqatini arlallit peqatigalugit nangittumik sorsuutiginninniarput innuttaasut qajannartumik inissisimasut pitsaasumik sullinneqarnissaat pillugu.
Suleqatigiissitsisut, piffissami sivitsortumi sakkortuunik aqqusaagaqartut, nuna tamakkerlugu innuttaasunik sullissinissartik pillugu tunniutiinnaqqajanngillat. Partiip siulittaasua, Tillie Martinussen aviisimut Sermitsiamut oqarpoq piareersimallutik sassaqqinnissaminnut, maannakkumuugallartoq siulersortitut sassartut sisamaagallarnerarput, taamaattorli partiip sassartitassai suli allannguuteqarsinnaapput marlunngorpat nalunaarfissaq kingulleq nalliutsinnagu.
Suleqatigiissitsisut sassarnerminni sulissutigerusutaasa pingaarnersaraat inuiaqatigiinni aaqqissuussaanerup allanngortiterneqarnissaa, tamannalu pissaaq suliassaqarfiit nammineq akisussaaffigileriikkat malunnaatilimmik aaqqissuuteqqinneqarnerisigut:
– Inuattut assavut atorlugit pikkoriffippassuaqarpugut. Nutaaliornissamut piginnaasaqarluarpugut aammalu assigiinngisitaartunik aallarnisaaniallaqqissuulluta, taamaattorli aaqqissuussaanerput pisoqalinikoq najumminiarsariinnarparput, aaqqissuussaanerullu taassuma periarfissagut pisinnaasagullu tapersersornagit akimmiffissalersuinnaleqqavai, Suleqatigiissitsisut siulittaasuat, Tillie Martinussen Sermitsiamut oqarpoq, isumaqarnerarlunilu aaqqissuussaanerup atorneqarsinnaajunaareersup najumminiarsarineratigut inuussutissarsiutitigut siuarsaaniarnerigaluaq akimmiffilersuinnavikkaa.
Ussassaarut
– Taamatuttaaq inunnik isumaginninnerup tungaatigut kisitsisit ersersippaat aaqqissuussaaneq nutarterneqartariaqartoq, taamaakkaluartoq tassa aaqqissuussaanerit isumaginninnerup iluani ingerlatiinnarneqartut aamma inuttut inuiaqatigiittullu piginnaasagut ajunngikkaluaqisut ipitittualeqqavaat. Taamaammat pisariaqarluinnarpoq aaqqissussaanerit atorsinnaajunnaareernikut iperarlugit nutaamik eqqarsartaaseqarluta aaqqissuusseqqinnerit uagutsinnut pisariaqartitatsinnullu naleqquttut politikkikkut aalajangersaasarnitsinni ingerlattariaqarpagut, assersuutigiinnarlugu peqqinnissap isumaginninnerullu tungaatigut aammalu akileraartarnerup atugarissaarnerullu tungaatigut, Tillie Martinussen Sermitsamut oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: