Ussassaarut
Tillie Martinussen: Meeqqat sumiginnarneqartut takornartaanngillat
Pinaveersaartitsisoqarnissaanut suliniutaasut malunnaatilimmik timitalerneqartariaqartut, Tillie Martinussen isumaqarpoq. Taassuma erseqqissarpaa meeqqat silami issiaarfiit ataanni unnuami sinittut, sumiginnarneqartuni kisiartaanngitsut.
Meeqqat marluk Nanortallup arsaattarfiata eqqaani issiaarfiit ataanni arfininngornerup unnuaani sinittut assilineqarsimaneri Facebookimilu saqqummiunneqarsimaneri atuartartunut assut aalassatsitsivoq.
Meeqqalli marluk unnuami angerlarsimanngitsut pillugit suliaq kisiartaanngilluinnartow, Suleqatigiissitsisunit Tillie Martinussenimit erseqqissarneqarpoq.
- Meeqqat marluk inuunerat pineqarpoq. Meerarpassuaqarporli assigusinnaasumik nalaataqartartunik. Pinaveersaartitsineq annertunerusumik ingerlatilinngikkutsigu pisut taama ittut nalaattuassavagut, Tillie Martinussen (Sul.) Sermitsiaq.AG-mut oqarpoq.
Ussassaarut
Imigassaq killilersorneqassava
Suleqatigiissitsisut inuup nammineersinnaaneranik politikkeqaraluarlutik, taamaattoq Tillie Martinussen oqarpoq imigassap atorneqartarnerata arlaatigut killilersorneqarsinnaaneranik isuma tikillattaasalersimallugu.
- Inuiaqatigiit killilersorneqarnissaanik siunertaqanngitsuugaluarpugut. Imigassartorsimatillunili ajornartorsiutit arlallit aqqusaartarneqartarnerat aamma isiginngitsuusaarsinnaanngilarput. Imigassap arlaatigut killilersimaarneqarsinnaaneranik isuma ilaatigut eqqarsaatigillattaasalerpara kiisa, oqarpoq.
Taassuma kissaatigilluinnarpaa ajornartorsiutit politikerinit aaqqinniarneqarnissaat. Angajoqqaallu ajornartorsiuteqartut ikiorneqarnissaasa aallunneqarnerulernissaat aamma piumasaralugu. Assersuutitut taavaa angajoqqaat sumiginnaasimatillutik piaartumik katsorsarneqalernissaannut neqeroorutit amigaatigineqartut.
Ilinniagaqarneq iliuuseqarnerlu
Meeqqat marluk silami sinittariaqarsimanerat pillugu Facebookimi saqqummiussisoqareertorlu, inuiaqatigiit sumiginnaaqataanerat pillugu Tillie Martinussen Facebookikkut oqallisissiaqarluni allaatiginnippoq. Nalunaaruteqartorlu immikkut nersualaarpaa paquminarsinnaasumik sapiissuseqarluni saqqummiussimmat.
- Aliatsannarluinnarporli inuiaqatigiinni qanoq iliuusissaarunneq, saaffissaarunnerluunniit pissutigigunarlugit annerusumik aaqqiissutaasinnaasumik susoqarnaviannginnera. Pissutsit isiginngitsuusaaginnarlugit inuunerup ingerlateqqinnissaa ajoraluartumik ajornannginneerarsuuvoq, oqarpoq.
Suleqatigiissitsisut tikkuarpaat ilinniagaqassutsip qaffakkiartornerani meeqqat sumiginnarneqarnissaannut aarlerinaat annikilliartortartoq.
- Taamaammat pingaaruteqarluinnarpoq suli amerlanerusut ilinniagaqartilerniarlugit politikerit sulissuteqarnissaat. Nunani allani misissuinerit takutippaat angajoqqaanngortut ilinniagaqarsimatillugit meeqqat sumiginnarneqarnissaannut aarlerinaat affaannanngoreersimasartoq, Tillie Martinussen oqarpoq.
Aningaasat isumatusaarnerusumik atorneqarlik
Taassuma nassuerutigaa meeqqat inuusuttullu pillugit suliniutit arlallit aallartissimasut. Tamakkuli iluaqutaassappata suliniutit suli amerlanerusariaqarput, allagaannaanngitsumik aammali iliuuseqarnermik kinguneqarlutik.
- Isumaqarpunga meeqqat inuusuttullu atugaat politikerinit sammineqarnerusariaqartut. Kingulitta atugaat pitsaaneroqqullugit suliniutit iliuuseqarnermik kinguneqartut amerlanerusariaqarput, aammali aningaasaliissutit maanna pioreersut isumatusaarnerusumik atorneqarsinnaapput, oqarpoq nangillunilu:
- Isumaqarpunga qinersisartut qinikkanut piumasaqarnerulertariaqartut meeqqat inuusuttullu atugaat pitsaaneroqqullugit. Suliniutit angisuut ajunngillat, tamannali isumaqassanngilaq suliniutit allat puigorneqassasut, oqarpoq.