Tillie politikkimik suliaqaannassaaq
Tillie Martinussenip partiimut sorlermut ilaasortanngussanerluni eqqarsaatersuutigaa. Michael Rosingip partiissaa periarfissanut ilaavoq
Ullut qulit matuma siorna Tillie Martinussen Demokraatiniit ilaasortaajunnaarpoq. Taassuma partiimi ilaasortaaginnarnissani takorloorsinnaanngilaa.
Imaanngilarli politikkimik suliaqarnini unitsinnialeraa.
- Unissinnaanngilanga. Naammassinngitsuukkakka amerlavallaarput, Tillie Martinussen Sermitsiaq.AG-mut oqarpoq.
Aamma atuaruk: Demokraatit nuimasortartik annaavaat - immikkoortoqarfik matuneqarpoq
Kinguaassiutitigut atornerluinerit
Taassuma, meeqqat kinguaassiutitigut atornerlunneqartarnerisa akiorneqarniarnerat, pingaartitaasa ilagaat. Tamannalu politikkimik soqutisaqarneranik aalajangiisuuvoq.
- Meeqqat inuusuttulli pillugit atugaqarnerit tamaasa, iliuuseqarusuttarpunga, taanna oqarpoq.
Aamma atuaruk: Randip aqutseriaatsini allanngortinnianngilaa
Eqqarsarluarusuttoq
Politikkimillu suliaqarnissi qularutiginngikkaluarlugu, Tillie Martinussenip partiimi sorlermi ilaasortaassanerluni suli aalajangersimanngilaa.
- Suli eqqarsaateqarpunga. Partiinit arlalinnit saaffigineqarsimavunga, eqqortumillu aalajangiinerunersoq qulakkeeqqaarusuppara.
Aamma atuaruk: Michael Rosingip partiissaa ilusinikkiartorpoq
Michael Rosingip partiia periarfissaavoq
Demokraatiusimasorli, Michael Rosing, massakkut partiimik pilersitsissamaartoq, suleqatigisinnaanera, eqqarsaatersuutaasa ilagaat.
- Kammalaatigiippugut, taamaammat Michaeli oqaloqatigillattaasarpara.
- Tassa periarfissanut ilaavoq. Taamaakkarluartoq suli aalajangersimanngilanga.
Socialpolitikki aalajangiissasoq
Kinguaassiutitigut atornerluisarnermik akiuerusunnerup saniatigut, Tillie Martinussenip aningaasanut politikki aamma soqutigisaraa. Siuarsangassallu nutaat pineqartillugit, suna pingaarteqarnerpaanersoq taassuma qularutiginngilaa.
- Qularutissaanngitsumik meeqqat inuusuttulli pingaarnersaapput. Socialpolitikki. Aningaasaateqarluarnissarlu suliniuteqarnissamut pingaaruteqarluinnarpoq.