Tillie: Qineqqusaarutaannaat Nunatsinni qaarsillartitsinavianngillat
Suleqatigiissitsisut siulittaasuat isumaqarpoq, Siumut naalagaaffinngornissamik oqaatsitigullu piumasaqaateqarnermik nalunaaruteqarneranut pissutaasoq qinersisartumik ikilisinnaanerat annilaanngatigalugu nuannareqqusaarnerusoq. Erik Jensenip isornartorsiuineq tunngavissaqannginerarpaa.
Siumumit naalagaaffinngornissaq pillugu arlalerialuni nalunaaruteqartarneq kingullertigullu Namminersorlutik Oqartussat suliffeqarfiutaanni sulisut kalaallisut oqalussinnaanerannik piumasaqarneq, Suleqatigiissitsisut siulittaasuata Siumup qineqqusaarluni naleqartitai naammagilersimavai.
- Ulluni kingullerni Siumut marlunnik siunnersuuteqarpoq, taakku siunnersuutit
immikkut tamarmik ersersippaat parti uippallerpasilersoq, qinersinissami aggersumi
angusarisassamikkut pitsaavallaanngitsumik inissisimaratariaannaanertik
takorluulersimarpasillugu, Tillie Martinussen oqarpoq.
- Tamanna oqaaseqarfiginianngilara. Qularinngilluinnarpara maannakkut taamatut qineqqusaarnitsi angusaqarluarnissarput. Suleqatigiissitsisut isornartorsiuinerisa erseqqissumik takutippaa, naalagaaffinngornissamut uatsinnit allaanerusumik isumaqartut, Siumumi siulittaasoq Erik Jensen Sermitsiaq.AG-mut oqarpoq.
Suleqatigiissitsisut isertuutinngisaannarpaat, partiiullutik Naalagaaffeqatigiit atuutiinnarnissaannik Danmarkimillu suleqateqarnerunissamik anguniagaqarnertik, tamannalu siulittaasup Siumumik isornartorsiuinermini aammaarluni erseqqissaatigaa.
- Ulluni makkunani, nunatta innuttaasa akornanniiipput qinersisartut, politikerinik
qatsusseqqasut. Qatsusseqqanerinut siumukkormiut pisuupput, Tillie Martinussen oqarpoq.
Oqartussaaffinnik sukkanerusumik tigusinissaq
Siumumit siunnersuutigineqarpoq, Kalaallit Nunaanni tunngaviusumik inatsisissaq pillugu innuttaasut taasitinneqassasut – naak tamanna nunatta naalagaaffinngornissaanik nassataqarnavianngitsoq, partiiminnilu anguniagassanik saqqummiussinerminni pingaartillugu oqaatigaat, oqartussaaffiit sukkanerusumik Danmarkimiit angerlaanneqassasut. Naak qinigaaffiup kingulliup ingerlanerani tassunga atatillugu susoqarsimanngikkaluartoq.
Erik Jensenip erseqqissaatigaa, at Siumut partiitut atuunnera tamaat naalagaaffinngornissaq anguniagaasimasoq.
- Tamanna nutaajunngilaq, aamma qineqqusaarutaannaanngilaq, taanna oqarpoq.
Tillie Martinussenip tupigusuutigaa, Siumut ”ullumi qineqqusaarutigalugu siunnersuutigimmassuk, namminersorlutik oqartussat suliffeqarfiutaanni atorfilittat 2025 tikitsinnagu, tamakkerlutik kalaallisut oqalussinnaasuussasut”. Kisiannigooq kalaallisut
oqalussinnaanngitsortaqassagaluarpata kinguneqartitsisoqassanani.
- Ukiummi qassersuit, partiip taassuma Nunatsinni pissaaneq tigummigamikku? Soorluuna sanngiinnersatta pilliutigineqarlutik, Siumup Savalimmiunik Qallunaallu-Nunaannik narruginninnerannut akiliisuunerat naammalissagaluartoq, taanna orulluteqarpoq.
Avisaartuutsitsisut
Tillie Martinussenip paaserusuppaa, sooq Siumut inuit nunami maani inunngorsimanatillu alliartorsimanngitsut immikkoortillugit nunatsinni inuiaqatigiinnik avissaartuutsitsinersut.
- Soormi Siumut kussiniliorunnaarluni, qinersisartugut nassuiaatiinnarunikkit, ukiuni 40-ni 30-nilu Isumaginninnerup- Peqqinnissaqarnerullu iluini akisussaaffimmissut
tigumminikuusatik, sooq taama ingerlanerliortigineri nassuiaallugillu sooq innuttagut
sanngiinnerit ima inisseqqalersimanersut, allaat ikiorneqarnissavimmissut,
ikiorneqarsinnaasaratik.