Tilliep neriuutaa: Maajip 27-at allanngorfiussasoq

Tillie Martinussen (Sul) politikerini meeqqat atornerlunneqartarnerisa oqallisigineqarnissaannut uteriinnerpaat ilagaat. er en af de politikere, der mest

Taamaattumik ippassaq Inatsisartuni akunnerit tallimat sinnerlugit oqallittoqarnerani oqaaseqartartutut oqalugiaataata misigissusilersaarfiunersaanera tupinnanngilaq.

Inatsisartut tamarmiusut Danmarkimut saaffiginnissuteqarniarlutik ataatsimoornerat, maanna kinguaassiutitigut atornerluisarnernik ajornartorsiuteqarnerup iluarsinissaanut ataatsimoortoqalernissaa, taassuma neriuutigalugu oqaatigaa.

- Ullumikkuussaaq kisitsisit ikiliartulernissaannut alloriarfik siulleq, taanna oqarpoq.

- Ullumikkuussaaq pereersunut qiviarfissarput oqarlutalu; taamani ataatsimoorpugut. - Tamaavitta. Immitsinnut ikiorpugut meerartagullu. Iliuuserput kusanarluinnarpoq.

- Inunnik isumaginninnermi, aningaasarsiornermi aamma ilinniartitaanikkut siumut aallariarfiuvoq pingaarutilik. Imaannaanngilaq, kisianni ulloq 27. maaji 2019 siunissaq pitsaanerusoq ornillugu alloriaqqaarpugut.

Tamakkiisumik isumaqatigiinngitsut

Siammasissumik isumaqatigiinneq aatsaat ippassaq ataatsimiinnissaq sioqqutilaarlugu pivoq. Naalakkersuisut siunnersuummik itigartitsillutik akissuteqaateqarsimagaluarput; kisianni mumittoqarpoq. Kim Kielsenip (S) ikinnerussuteqalernissaq pinngotsoornialugu tamanna pisoq ammasumik KNR-imut nassuerutigaa.

Naak ataatsimut isigalugu politikerit angusaqarluarniarlutik oqallinniarsarigaluartut, partiit naalakkersuisoqatigiit Siumut aamma Nunatta Qitornai illuatungeralugit, illuanilu partiit sisamaasut tamakkiisumik isumaqatigiinnginnerat ersarippoq.

Naalakkersuisoqatigiit Danmarkimit ikiorneqarnissaq kissaatigalugu aalajangiusimavaat, tamatuma saniatigut kommunit, ingammik Kommuneqarfik Sermersuup suliassaq kivissinnaaneraa apeqqusiipput.

Naalakkersuisut qallunaat naalagaaffiat meeqqanut inuusuttunullu suliassaqarfimmi suliassat pillugit kivitsinissamut ikiueqqullugit qinnuigippassuk, taava soorunami apererusunnassaaq: Kommunit suliassamik kivitsisinnaappat? Nunami politikeriusugut tamanna pillugu isummertariaqarpugut, peqqussutsimut isumaginninnermullu naalakkersuisoq, Martha Abelsen (S) taama oqarpoq.

Sumiginnaanermik nassuerutiginninneq

Partiinit siunnersuuteqartunit, Partii Naleqqamit, Demokraatinit, IA-mit aamma Suleqatigiissitsisunit nalunaarutigineqarpoq, maannamut suliniutaasimasut naammannginnerannik nassueruteqarnermik siunnersuut ilaqartoq.

- Nassuerutiginninneq tamanna pingaaruteqarpoq, Mikivsuk Thomassen (IA) taama oqarpoq.

- Maanna siammasissumik suleqatigiinniarsarissaagut, suna pingaarnerunersoq paasiniarlugu.

Partiit tamarmik, Naalakkersuisut aamma kommunit akornanni siammasissumik suleqatigiinnerup pingaassusaa Randi Vestergaard Evaldsenip (D) aamma naqissuserpaa, siunnersuullu Naalakkersuisut maanna tapersermassuk nuannaarutigalugu.

- Maanna sapangissanngilarput. Suleqatigiinngikkutta ajorsaqqeriaannaavugut. Nuna tamakkerlugu iliuusissatut pilersaarummik suliaqassaagut.

Qinersisoqalernerani oqallittoqarnerani eqqumiitsuliortup Gukki Nukap politikerit partiinit tamaneersut tasiorlutik, kinguaassiutitigut atornerluinerit oqaluuserisassani pingaarnersaatissagaat meeqqanut neriorsuitippai.

Tamanna neriorsuut politikerit piviusunngortinneranut ulloq ippassaq aallarniutaanissaa, Tillie Martinussenip neriuutigaa.