Tillinniartoqartoq: Imigassat aningaasallu tillinneqarsimasut
Qaqortumi suliffeqarfimmi marlunngornerup ullaassaani tillinniartoqarsimanera Qaqortumi politiit paasiniarpaat. Suliami pasisaqartoqanngilaq, politiilli malitassaqarluarput. Pisoq innuttaasunit maluginiarneqarluarpoq, suliffeqarfiummi videomik nakkutilliissutaani immiussat inuit nittartakkakkut attaveqatigiiffianni siammarneqarsimapput.
Qaqortumi politiit suliffeqarfimmi marlunngornermi 5. september ullaassaani tillinniartoqarsimanera paasiniaaffigaat.
- Ilisimatitsissutigisinnaavarput imigassat sakkortuut aningaasallu amerlanngitsut tillinneqarsimasut, Kalaallit Nunaata Politiivi Sermitsiaq.AG-mut ilisimatitsipput.
Suliffeqarfimmi sorlermi tillinniartoqarsimanera politiit maanna oqaatigerusunngilaat.
Suliami tigusarinnittoqarsimanngilaq
Videokkut nakkutilliissutini immiussat politiit maanna tigummisaanni takuneqarsinnaavoq marlunngornerup ullaassaani nalunaaqutaq 01.25-02.00 akornanni tillinniartoqarsimasoq.
- Takunnissimasinnaasut tillinniartoqarneranilluunniit allatigut ilisimannittut Qaqortumi politiinit oqaloqatigineqarusupput.
Suliffeqarfiup piginnittuata tillinniartoqarsimanera politiinut marlunngornermi nal. 09.13 nalunaarutigisimavaa.
Nakkutilliissutini immiussat Facebookimi siammarneqartut
Suliami suli tigusarinnittoqarsimanngilaq pasisaqartoqaranilu, paasiniaanermili malitassaqarluartoq, politiit ilisimatitsipput.
Suliffeqarfiup piginnittuata nakkutilliissutinit videot immiussat inuit nittartakkakkut attaveqatigiiffianni siammarsimavai, kingornali peeqqillugit.
Videot Facebookimi siammarneqalertorsimapput oqallitsitsingaatsiarsimallutillu.
Innuttaasut suliffeqarfiilluunniit pinerluttoqartillugu nakkutilliissutinit immiussanik siammarterisarnerat malittarisassanik unioqqutitsinermut qanissinnaasarpoq. Pisumili taama iliortoqarsimanera paasiniarneqartunut ilaanersoq politiit maanna oqaatigiumanngilaat.