Timmisartoq Challengeri Kangerlussuarmut ataavartumik inissinneqartoq

Illersornissaqarfiup timmisartuutaa Challenger CL604 ukiorpassuarni ukiumut ullut 220-t Kangerlussuarmiitinneqartarsimavoq. Siunissamili ataavartumik Kalaallit Nunaanniitinneqalissaaq.

Challenger CL-604

Inuttat: 2-5

Sukkassusaa (tamakkiisumik): 850 km/t

Ingerlaarfigisinnaasaa: 6.500 km

Silissusaa: 19,6 m

Takissusaa: 20,9 m

2016-imi Issittoq pillugu isumaqatigiissut naapertorlugu taamatut aaqqiisoqartoq, Illersornissaqarfiup tusagassiorfinnut nalunaarutaani allassimavoq.

- Luftgruppe Vest aamma timmisartoq Challenger, sakkutuut atortui allat, soorlu umiarsuit alapernaarsuutit, qulimiguullit, siriuspatrulje il. il. Kalaallit Nunaanni ukiorpassuarni pisoqartarnerani upalungaarsimanermut atortuulluarsimapput, Issittup Sakkutooqarfiani kontreadmiral Martin la Cour-Andersen oqarpoq.

- Timmisartoq ilaatigut radarikkut assilisanik, infrarød atorlugu immiussanik, inuttat Kalaallit Nunaanni Savalimmiunilu nalinginnaasumik immiussaannik takunnissimasutullu nalunaarutaannik pissarsinissamut periarfissiisarpoq, tassa imaani annaassiniarnissaq, qaqqami ujaasinissaq, umiarsuit ikuallanneranni kinnguneranniluunniit, qaqqat innaasa sisoorneranni il. il. nalunaaquttap akunnialuisa ingerlanerinnaani susoqarneranik erseqqissumik paasisaqartoqarsinnaasarpoq, kontreadmirali nassuiaavoq.

Isumannaallisaanermut pingaaruteqartoq

Illersornissaqarfik naapertorlugu timmisartumi Challengerimi atortorissaarutit atorlugit paasissutissanik katersisoqarsinnaavoq, paasissutissat Illersornissaqarfiup aamma upalungaarsimanermi immikoortortat allat, umiarsuit, qulimiguullit timmisartullu assersuutigalugu inunnik imaanit annaassiniarnermi atorsinnaavaat.

Challengermit annaassiniartut allat sumiiffimmut eqqortumut toqqaannartumik ingerlatissinnaavai, soorlu aamma timmisartoq ajornartorsiortoqarnerani toqqaannartumik ikiuussinnaasoq.

- Luftgruppe Vest aamma Challengeri Kalaallit Nunaanni sumiiffinni tamani ikiuussinnaapput, soorlu alapernaarsuinermi aamma annaassiniarnermi atortut allat aqqutissaannik innersuussinermi, toqqaannartumillu annanniutinik ajornartorsiornermilu ikiorsiissutinik tunniussisinnaalluni. Kalaallit Nunaanni, Savalimmiuni inuiaqatigiinnilu isumannaallisaanermut tamanna malunnaatilimmik iluaqutaasarpoq, Martin la Cour-Andersen oqarpoq.

Avatangiisini suliassanut aamma atorneqartartoq

Timmisartoq suliassai allat tassaapput naalagaaffiup pigisaanik nakkutilliineq aamma nunami silaannarmilu nakkutilliineq. Timmisartoq aamma aalisarnermik nakkutilliinermut atorneqartarpoq, tassa aalisarneq pillugu isumaqatigiissutaasimasunik kiisalu imaani tikikkuminaattumi inatsisinik malinnittoqarnersoq nakkutiginnittarpoq.

Timmisartoq aamma assartuinermut avatangiisinillu nakkutilliinermut, soorlu assersuutigalugu uuliakoortoqarsimanersoq misissuinermut atorneqartarpoq.

Illersornissaqarfimmit ilisimatitsissutigineqarpoq, timmisartumik aserfallatsaaliisoqartillugu iluarsaassisoqartillugulu kiisalu inuttat paarlaanneranni piffissami sivikitsumi timmisartoq atorneqarsinnaasanngitsoq.