Timmisartortartoq inuusuttoq Kulusuk Narsarsuarlu aqqusaarlugit ingerlaarniartoq
19-inik ukiulik Zara Rutherford kisimiilluni nunarsuaq kaajallallugu timmisartorniarpoq. Anguniakkani angussaguniuk arnani inuusunnersaalluni nunarsuarmik kaajallaalluni rekordiliisussaavoq. Angalanermini Nunarput aqqusaarniarpaa, neriuutiginerarpaalu Naligiissitaanermut Naalakkersuisoq Naaja Nathanielsen naapissinnaassallugu.
Inuusuttoq timmisartumik nunarsuarmik kaajallaaniartoq, aggustip 20-ani Kulusummut aggustillu 21-ani Narsarsuarmut minnissani pilersaarutiga. Nunatsinniinnermini Naligiissitaanermut Naalakkersuisoq Naaja Nathanielsen naapikkusuppaa. Timmisartortartup inuusuttup tikinnissani ilisimatitsissutigalugu Naaja Nathanielsen nalunaarfigisimavaa. Taassuma kissaatigaa, arnat silaannakkut angalasarnermik soqutigisallit tapersersorneqarnissaasa qanoq pingaaruteqartiginera aamma naligiissitaaneq pillugit naalakkersuisoq oqaloqatigisinnaallugu.
Nunarsuarmi rekordiliiniarnermini anguniagaraa, arnat inuusuttut niviarsiaqqallu silaannakkut angallannerup naligiissitaanerullu iluini periarfissaqarnerat pillugu ilisimaarinnittoqarnerulernissaa
- Tamanna piffissami sivisoorujussuarmi takorluugarisimavara, tamatigulli piviusorsiortutut isikkoqarneq ajorsimalluni. Universitetimi ilinnialersinnaga ukioq ataaseq sunngiffeqarniarlunga aalajangerama paasilerpara piffissaqarluarlunga - taamaammallu qanorluunniit iliuuseqarsinnaavunga, Rutherford CNN Travelimut oqaluttuarpoq.
Zara Rutherford 14-inik ukioqarluni timmisartumik ingerlatsisinnaanermik ilinniarsimavoq. Angajoqqaavi tamarmik timmisartortartuupput. Timmisartortartup inuusuttup timmisartumik ingerlatsisinnaanermut allagartani siulleq 2020-mi pissarsiaraa.
Qammatit marluk ingerlaneranni nunat 52-it
Arnaq inuusuttoq Nunatsinneereeruni Canadamut, Amerika Kujallermut, USA-mut ingerlariarluni nunarsuup kangianut ingerlaqqissaaq.
- Aqqutissakka misissoreersimavakka, sunik naammattuugaqarsinnaaera ilisimareerpara, taanna oqarpoq.
Angalanini Belgiamit aallartillugulu Belgiami naaniarpaa. Nunat tikiffigisani ataasiarluni marloriarluniluunniit unnuiffigisarniarpai. Rutherford ”isikkiviginnerani” timmisartortarniarpoq, tassa ingerlaanermini erseqqissumik takusaqarsinnaarusuppoq, taamalu unnuakkut silarlunneranilu angalasarniarani. Zara Rutherfordip nunani tikiffigisamini meeqqat atuartut inuusuttullu isumassarsitikkusullugit naapittarniarpai.
- Takorluukkatik tamaasa angusinnaalluarpaat, Rutherford oqarpoq.
Ullumikkut Shaesta Waiz, arnat timmisartortartut inuusunnersaattut nunarsuarmik kaajallaasimasutut rekordeqarpoq. Taanna 30-nik ukioqarluni rekordiliisimavoq.