Timmisartumik aqqutip ammaqqinneqarnera nuannaarutaasoq: - Amerlasuut utaqqinikuuaat
Iqaluit Nuullu akornanni timmisartuussinerit Air Greenlandip 2024-mi ammaqqilerpai.
2024 juni aallarnerfigalugu Nuummiit Nunavumiittumut Iqalunnut, illoqarfiit pingaarnersaasut marluusut akornanni Air Greenlandip ingerlaarfik ammaqqippassuk, toqqaannartumik timmisartortoqaqqissinnaalissaaq.
Aviisi Sermitsiaq taamak allaaserinnippoq.
Jaqqa Petersen ilaqutaalu ingerlaarfimmik iluaquteqalertussat ilagaat. Ukioq manna aggustimi Nuummut uteqqinnissartik tikillugu, 2018-imili Iqalunni najugaqarput.
- Qularnanngilaq ingerlaarfik atorluassagipput, aammali Iqalunni ikinngutitta ilaquttattalu Nuummut tikeraarusuttorujussuuaatigut, Jaqqa Petersen oqarpoq.
Ilaqutariit Jaqqa Petersen, aappaa Iqalunneersoq meeraallu marluusut, siornatigut siumut utimullu timmisartorniaraangamik koruuninik titusindilikkaanik akiliisarsimapput. Ottawamut Torontomulluunniit timmisartorlutik unnuiartoqqaartarsimapput, kingornalu Islandimut timmisartoqqillutik. Taamaaleriarlutik neriuttarput ulloq taanna Kalaallit Nunaannut aallartoqassasoq. Angalaneq katillugit ullut pingasut sivisussuseqarsinnaasoq.
- Taamaanngikkaangat attartukkanik timmisartoqartarpoq, inissaqarniaraannili iluatsitsisoqartariaqarpoq ilisarisimasaqarluniluunniit, inissarlu ataaseq koruuninik 10.000-inik akeqartarpoq, Jaqqa Petersen oqarpoq.
Ataqatigiinnermik annerusumik pilersitsissasoq
Kalaallit Nunaata Nunavullu akornanni angallassinerit iluatsitsiffiunngitsumik misilinneqareernikuupput. 2014-imiit 2016-imut Air Greenland ingerlaarfimmi timmisartuussisarpoq, taamanikkulli ammatiinnarnissaanut ilaasukippallaarluni.
Nunavut Kalaallit Nunaatalu akornanni 2022-mi suleqatigiinnissamut isumaqatigiissummi, Naalakkersuisut siulittaasuanit, Múte B. Egedemit (IA) Nunavummilu premierministerimit, PJ Akeeagokimit atsioqatigiissutigineqartumi, ingerlaarfimmik ammaaqqinnissaq ilassutaavoq. Kulturi, ilinniartitaaneq, aalisarneq nuttarluarsinnaanerunerlu pillugit suleqatigiinnerup annertusarnissaa isumaqatigiissummi kissaataavoq.
Allaaserisaq tamaat aviisimi Sermitsiami atuaruk:
