Timmisartuussivik avammut timmisartuussivinngorpoq
Kastrup Lufthavnimiit Kalaallit Nunaannut Savalimmiunullu nunap iluani timmisartuussivittut taaneqartartut avammut timmisartuussivinngortinneqarput. Tamatuma kingunerisaanik akitsuutit qaffassapput.
Savalimmiormiu Høgni Hoydalip, Tjódveldi, TF-imeersup, ernumanartoqartippaa, Timmisartukkut Angallannermut inatsisikkut Savalimmiunut Kalaallit Nunaannullu timmisartumut ilaasut akitsuiffigineqarnissaat, pissutigalugu 2009-mi oktobarip aallaqqaataaniit aallarnerit nunanut allanut aallarnertut isigineqartalissammata.
Allannguineq tamanna ilaasumut ataatsimut akitsuutit 456 procentinik, tassa 90 koruunit missarpiaannik, qaffanneqarnerannik kinguneqassaaq.
Taamaattumik angallannermut ministerimut Lars Barfoedimut (K) paragraf 20-ikkut apeqqummini apeqqutigaa, sunik alloriaateqarniarnersoq Savalimmiunut Kalaallit Nunaannullu aammalu taakkunannga timmisartuussiviit, issuaaneq: naammaginanngitsumik unammillernermi atugassaqartinneqannginnissaat, qulakkeerniarlugu.
- Tamanna siullermik naleqqutinngilluinnartumik naammaginanngilluinnartumillu akitsuutinik qaffaaneruvoq, ullormiit ullormut atuutilersussatut eqqarsaatigineqartumik, timmisartortitseqatigiiffinnillu pingaarnerusumik ingerlatsinerannik sakkortoorujussuarmik eqquisussaq ilaasullu ataasiakkaat akiinut tatisisissuaq. Sabvalimmiuni Kalaallit Nunaannilu politikkikkut oqartussaasut timmisartortitseqatigiiffiillu sorsuutigaat timmisartornermi akit ima appasitsiginissaat, inuiannarnut periarfissaqassalluni nunat akornanni angalanissaq - timmisartukkullu attaveqaatit inuiaqatigiinni qeqertarmiuni savalimmiormiutut kalaallisullu ittuni angalanermi periarfissat pingaarnersaraat, Høgni Hoydal tunngavilersuivoq, tamannalu taallugu angallasseriaatsimik nutaaliaasumik innuttaasunik allanut sanilliunneqarsinnaasumik pissarsiniarnermi kinguariarnertut.
- Aappassaanik selskabit assigiissumik atugassaqarlutik unammillersinnaanerannut ingerlatsivimmillu peqqissumik akilersinnaasumillu ingerlatsisinnaanerannut allannguineq naammaginanngilluinnarpoq. Tassami Savalimmiuni Kalaallit Nunaannilu timmisartukkut angallannermi inatsisiliornermilu kiisalu timmisartukkut angalatitsinermi nunani tamalaani isumaqatigiissutinut Danmarki politikkikkut oqartussaatillugu, Savalimmiut Kalaallit Nunaallu, assersuutigalugu savalimmiut/kalaallit silaannaannik atuinermik akitsuutinik piumasaqarnermi isertitsissutaasinnaasunut atatillugu iluaqutissaqanngillat aammalu timmisartuussivinnik killeqanngitsumik ingerlatsisinnaanatik aammalu nunani tamalaani tuniniaavimmi killeqanngitsumik unammillernermi peqataasinnaanatik.
Statens Lufthavnsvæsen Air Greenlandilu oqaaseqartissinnaasimanngilagut.