Titartakkat: Kalaallit Nunaanni atuarfiit annersassaat takuuk
Kalaallit Nunaanni atuarfiit annersassaat Nuup qeqqaniittussaq perorsaanikkut nutaanik ilinniartitseriaaseqarnissamik periarfissiisumik sinaakkusersorlugu aaqqissugaavoq
Suliffeqarfik Istak Islandimeersoq Nuup qeqqani Ask-ip Usk-illu taartissaannik atuarfiliornissaq suliarinnittussarsiuunneqarmat toqqarneqarpoq. Pilersaarutaavoq sanaartorneq aappaagu aallartinneqassasoq 2023-milu naammassineqarsimassasoq.
Meeqqanut Atuarfeqarnermullu Ingerlatsivimmi pisortaq Helene Berthelsen kommunip nittartagaatigut oqarpoq:
- Nuannaarpunga suliniut taannarpiaq toqqarneqarmat, patajaatsuummat siunissamilu perorsaariaatsinik atuilernissamut annertuumik periarfissiimmat.
Helene Berthelsen atuarfiullu ningiua Karno Lynge suliap ingerlanerani peqataasimapput, tassanilu ingerlatsivik, atuarfiit aqutsisui, trinini aqutsisut, klassini immikkut atuartitsiffiusuni ilinniartitsisut perorsaasullu Siorarsiorfik - Nuuk City Developement A/S suleqatigalugu atuisunut najoqqutassamik ilusilersueqataatinneqarsimapput.
- Taamaaliornikkut sapinngisamik qulakkeerniarneqarsimavoq, meeqqat, ilinniartitsisut sulisullumi allat pitsaasunik atugassaqartinneqarnissaat”, Helene Berthelsen oqarpoq, isumaqarlunilu, meeqqat siunissami ilinniagaqaqqinnissaannut pitsaanerusunik periarfissaqartitsilernikkut toqqammavissaqarluarnerulernissaat anguneqassasoq.
Perorsaanikkut ilinniartitsinikkullu najoqqutassat
Naliliisartoqatigiit qitiutillugu sammisimavaat, siunissaq ungasinnerusoq eqqarsaatigalugu meeqqanut tamanut qanoq iliorluni atugassanik pitsaanerpaanik pilersitsisoqarsinnaanersoq. Meeqqat nukissallit nukissakinnerusullu atuarnerminni pissarsisussaapput, tamannalu ilaatigut pissutigalugu meeqqat ataasiakkaat qitiutillugit atuartitsinerup aaqqissuunneqarnissaanut pitsaanerpaamik periarfissaqartitsilluni neqerooruteqartoq toqqarneqarpoq, kommuni allappoq.
Aammami anginerusumik atuarfeqarnikkut meeqqanut iluaqutaasussanik pitsaaquteqarneruvoq.
- Atuarfimmi anginerusumi init pilersinneqarnissaat ajornannginnerusarpoq, meeqqat tamarmik ilorrisimaarniassammata. Aammalu perorsaanermi atuartitsinermilu najoqqutassanik ineriartortitsinissamut periarfissagissaarnerulersitsisarpoq, ilinniartitsisut perorsaasullu illorsuami ataatsimiikkunik immikkut isumasiorsinnaasut arlaqarnerussammata, Karno Lynge oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
