Tivoli ukiuni tallimani aatsaat taamak ornigarneqartigaaq
Inuit 4 millioninit amerlanerit 2012-imi Tivoli aqqusaarpaat. 2011-mit procentinik marlunnik amerlanerit - 'Grønland i Tivoli' nuannaajallassutigineqarpoq
Københavnimi naatsiivitoqarsuaq qularutissaanngitsumik suli kajumerineqartaqaaq.
2012-imi Tivolimut alakkaasut kisitsisaat 4.033.000-upput. Tamanna isumaqarpoq 2011-mut naleqqiullugu alakkaasut 70.000-nik amerleriarsimasut imaluunniit 2 procentinik amerlanerusut.
Tivolip pisortaanerata tikkuarpaa ukioq manna alakkaasut 2007-imi alakkaasunit aatsaat amerlanerunerat.
- Naammagisimaarnarpoq minngunngitsumik nuannaajallannarluni suli Tivoli inunnit soqutigineqarluarmat naak aningaasatigut ajornartorsiortoqaraluartoq qallunaat aningaasaqarnerannik sunniisumik, pisortaq Lars Liebst oqaaseqaammi ersersitsivoq.
'Jul i Tivoli' 2012, ukiup siulianut naleqqiullugu sapaatip akunneranik sivikinneruvoq Tivolimi Halloweenisiorneq sapaatip akunneranik tallineqarmat.
2012-imi Jul i Tivoli-mut orniguttut 857.000-upput 2011-mi 889.000-usut, tamanna naammaginartutut taaneqarsinnaasoq tusagassiivinnut nalunaarummi erserserpoq.
Grønland i Tivoli tupaallaatigineqarpoq
2012-imi ’Grønland i Tivoli’ 55.000-nit peqataaffigineqarpoq naatsorsuutigisamit ornigarneqarluarnerulluni. 2011-mi ulluni pingasuni peqataasut 60.000-iupput.
Peqatigiiffimmik Grønland i Tivolimik aqutsisut aasaq Sermitsiaq.AG'mut oqaluttuarput peqatigiiffimmit naatsorsuutigineqartoq ulluni marlunni 40.000-t ornigunnissaat siornatigumut naleqqiullugu aaqqissuussineq sivikillineqarmat.
Tivoli aasaaneranut apriilip aqqarnganni ammaqqissaaq, nuannaariarfissaq 1300 kvadratmeteriusoq Tycho Brahemit isumassarsiarineqarsimasoq aliikkutassanik nutaanik peqassaaq aamma sammisassanut atugassaq 600 kvadratmeterinik ilaneqarsimavoq.